آج بارش کہاں گی؟ محکمہ موسمیات کی پیشگوئی
آج کراچی میں موسم ابر آلود رہنے کا امکان ہے، جبکہ شہر کے مختلف علاقوں میں کہیں کہیں ہلکی بوندا باندی بھی ہو سکتی ہے۔ اس پیشگوئی کے بعد شہریوں کو حبس اور گرمی میں جزوی کمی کی امید ہے۔
محکمہ موسمیات کے مطابق کراچی میں صبح کے وقت درجہ حرارت 30 ڈگری سینٹی گریڈ ریکارڈ کیا گیا، جبکہ دن کے دوران پارہ 36 ڈگری سینٹی گریڈ تک پہنچنے کا امکان ہے۔ سمندری ہوائیں معمول کے مطابق چلنے کی توقع ہے، جس سے موسم نسبتاً بہتر رہ سکتا ہے۔
دوسری جانب وفاقی دارالحکومت اسلام آباد میں آج موسم گرم اور مرطوب رہنے کی پیشگوئی کی گئی ہے۔ محکمہ موسمیات کا کہنا ہے کہ شام کے وقت مطلع جزوی طور پر ابر آلود ہو سکتا ہے، تاہم دن بھر گرمی کی شدت برقرار رہنے کا امکان ہے۔ صبح کے وقت اسلام آباد میں درجہ حرارت 29 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 40 ڈگری سینٹی گریڈ تک پہنچ سکتا ہے۔
ادھر گلگت بلتستان، آزاد کشمیر اور بالائی خیبر پختونخوا کے مختلف علاقوں میں گرج چمک کے ساتھ بارش کا امکان ظاہر کیا گیا ہے۔ محکمہ موسمیات کے مطابق ان علاقوں میں کہیں کہیں تیز بارش بھی ہو سکتی ہے، جس کے باعث مقامی ندی نالوں میں پانی کے بہاؤ میں اضافہ ہونے کا خدشہ ہے۔
یہ بھی پڑھیں:آیت اللّٰہ خامنہ ای کے جنازے پر ایرانیوں کے آنسو دیکھ کر حیران ہوا، ٹرمپ
ماہرین موسمیات نے شہریوں کو مشورہ دیا ہے کہ شدید گرمی کے دوران غیر ضروری طور پر دھوپ میں نکلنے سے گریز کریں، زیادہ سے زیادہ پانی استعمال کریں، جبکہ بارش والے علاقوں میں سفر کرنے والے افراد موسم کی تازہ صورتحال سے باخبر رہیں تاکہ کسی بھی ناخوشگوار صورتحال سے بچا جا سکے۔
