پنجاب حکومت کی ماس ٹرانزٹ سسٹم میں مفت سفری سہولت ختم
تفصیلات کے مطابق پنجاب ماس ٹرانزٹ اتھارٹی نے میٹرو بس، اورنج لائن ٹرین، سپیڈو بس اور الیکٹرک بسوں میں مفت سفر کی سہولت ختم کرنے کی تصدیق کر دی ہے۔
جی ایم آپریشن ماس ٹرانزٹ اتھارٹی عزیر شاہ کے مطابق پنجاب بھر کے ماس ٹرانزٹ سسٹم میں آج رات تک مفت سفری سہولیات میسر رہیں گی، تاہم کل سے تمام مسافروں کو مقررہ کرایہ ادا کرنا ہوگا۔
یہ بھی پڑھیں: ماہانہ 15 ہزار وظیفہ،پنجاب حکومت نے خواتین کو خوشخبری سنا دی
حکام کے مطابق مفت سفری سہولت اپریل 2026 میں عوامی ریلیف پیکج کے تحت شروع کی گئی تھی، ابتدائی طور پر اس سہولت کا اعلان ایک ماہ کے لیے کیا گیا تھا۔
ذرائع کے مطابق حکومت نے مفت سفر کی سہولت میں مزید توسیع پر بھی غور کیا تھا اور اس حوالے سے سفارشات بھی تیار کی گئی تھیں، تاہم اب اس سہولت کو ختم کرنے کا فیصلہ کر لیا گیا ہے۔
پٹرولیم مصنوعات کی قیمتوں میں خاطر خواہ کمی نہ آنے کے باوجود حکومت کی جانب سے سبسڈی ختم کرنے کے فیصلے پر شہریوں میں تشویش پائی جا رہی ہے۔
