اردو ڈائجسٹ کے بانی الطاف حسن قریشی انتقال کرگئے
ان کے انتقال کی خبر سامنے آنے کے بعد صحافتی حلقوں، سیاسی شخصیات اور سماجی رہنماؤں کی جانب سے گہرے دکھ اور افسوس کا اظہار کیا جا رہا ہے۔
مرحوم کے صاحبزادے کامران الطاف کے مطابق الطاف حسن قریشی کی نماز جنازہ نماز ظہر جامعہ اشرفیہ لاہور میں ادا کی جائے گی، جہاں ان کے چاہنے والے، صحافی اور مختلف شعبہ ہائے زندگی سے تعلق رکھنے والی شخصیات شرکت کریں گی۔
وزیراعظم محمد شہباز شریف نے الطاف حسن قریشی کے انتقال پر اظہار تعزیت کرتے ہوئے کہا کہ ان کی وفات سے صحافت کے شعبے میں ایسا خلا پیدا ہوگیا ہے جسے پر کرنا آسان نہیں ہوگا۔ وزیراعظم نے مرحوم کے درجات کی بلندی اور اہل خانہ کیلئے صبر جمیل کی دعا بھی کی۔
وفاقی وزیر منصوبہ بندی احسن اقبال نے اپنے تعزیتی پیغام میں کہا کہ الطاف حسن قریشی ایک روشن فکری شخصیت تھے جنہوں نے اپنی تحریروں اور نظریاتی بصیرت سے صحافت کو نئی سمت دی، مرحوم نے ہمیشہ ذمہ دار، باوقار اور اصولی صحافت کو فروغ دیا اور نوجوان صحافیوں کیلئے قابل تقلید مثال قائم کی۔
سابق امیر جماعت اسلامی سراج الحق نے بھی افسوس کا اظہار کرتے ہوئے کہا کہ الطاف حسن قریشی نے صحافت، قومی شعور اور فکری بیداری کیلئے گراں قدر خدمات انجام دیں۔
یہ بھی پڑھیں:نامور شاعر اور اسسٹنٹ پروفیسر قاتلانہ حملے میں جاں بحق
الطاف حسن قریشی کی وفات کو صحافتی دنیا ایک بڑے نقصان کے طور پر دیکھ رہی ہے، جبکہ ان کی علمی، فکری اور صحافتی خدمات طویل عرصے تک یاد رکھی جائیں گی۔
