امریکی صدر ڈونلڈ ٹرمپ اپنے سوشل میڈیا پلیٹ فارم ٹروتھ سوشل پر اعلان کیا کہ پاکستان کے سپہ سالار فیلڈ مارشل سید عاصم منیر اور وزیر اعظم شہباز شریف کی درخواست پر فی الحال ایران پر حملے پر مؤخر کر رہے ہیں۔ امریکی صدر نے دعویٰ کیا کہ ایران کی حکومت اندرونی طور پر شدید تقسیم کا شکار ہے۔
یہ بھی پڑھیں: جنگ بندی ختم ہونے میں وقت کم، توسیع نہیں ہو گی: ڈونلڈ ٹرمپ
ٹرمپ کے بقول پاکستان کے فیلڈ مارشل عاصم منیر اور وزیراعظم شہباز شریف کی جانب سے ہمیں یہ کہا گیا ہے کہ ایران پر حملہ اس وقت تک مؤخر رکھا جائے جب تک وہاں کی قیادت اور نمائندے کسی مشترکہ تجویز پر متفق نہیں ہو جاتے۔ انہوں نے بتایا کہ اس کے بعد امریکی فوج کو حملے نہ کرنے کی ہدایت کی ہے تاہم ایران کے خلاف بحری ناکہ بندی جاری رکھنے اور ہر ممکن صورتِ حال کے لیے تیار رہنے کے احکامات بھی دیئے ہیں۔
امریکی صدر نے جنگ بندی میں بھی توسیع کا اعلان کرتے ہوئے کہا کہ یہ توسیع اس وقت تک برقرار رہے گی جب تک ایران کی جانب سے باضابطہ تجویز پیش نہیں کی جاتی اور مذاکرات کسی نتیجے تک نہیں پہنچ جاتے۔
ایک اور بیان میں ڈونلڈ ٹرمپ نے کہا کہ ایران نہیں چاہتا کہ آبنائے ہرمز بند ہو، ایرانی چاہتے ہیں آبنائے ہرمز کھلی رہے تاکہ روزانہ 500 ملین ڈالر کما سکیں، اگر آبنائے ہرمز بند ہو جائے تو ان کا نقصان ہوگا، وہ صرف یہ کہتے ہیں کہ آبنائے ہرمز بند کرنا چاہتے ہیں، میں نےآبنائے ہرمز کو مکمل بند کر رکھا ہے اس لیے وہ صرف اپنی عزت بچانا چاہتے ہیں۔
امریکی صدر نے کہا کہ چار روز پہلے لوگوں نے مجھ سے رابطہ کیا اور کہا ایران فوری طور پر آبنائے ہرمز کھولنا چاہتا ہے، ہم ایسا کرتے ہیں تو ایران کے ساتھ کبھی کوئی معاہدہ نہیں ہو سکتا، ایران کی قیادت سمیت جب تک باقی ملک کوتباہ نہ کر دیں معاہدہ نہیں ہو سکتا۔
