وزیراعظم آفس کی جانب جاری بیان میں کہا گیا ہے کہ وفاقی سرکاری ملازمین کو عیدالفطر کی چھٹیوں سے پہلے تنخواہ ادا کر دی جائے گی۔
بیان میں کہا گیا کہ وفاقی سرکاری محکموں کو وزیراعظم کی ہدایات موصول ہوگئی ہیں، محکموں نے تنخواہ عید سے پہلے ادا کرنے کےلیے کام شروع کردیا ہے۔
یاد رہے کہ اس سے قبل سندھ حکومت بھی مارچ 2026 کی تنخواہیں اور پنشن قبل از وقت ادا کرنے کا اعلان کر چکی ہے۔
عیدالفطر کے پیش نظر سندھ حکومت نے ملازمین کو ریلیف دینے کیلئے یہ خصوصی فیصلہ کیا ہے، سرکاری ملازمین کو مارچ کی تنخواہیں اور مراعات 16 مارچ کو ملیں گی، مارچ کی تنخواہیں اور مراعات عید سے پہلے ادا کی جائیں گی۔
یہ بھی پڑھیں: عیدالفطر سے قبل تنخواہوں اور پنشن کی پیشگی ادائیگی کا اعلان
حکومتِ سندھ کے اس فیصلے کا مقصد عیدالفطر سے قبل سرکاری ملازمین اور پنشنرز کو مالی سہولت فراہم کرنا ہے تاکہ انہیں عید کی تیاریوں کے دوران کسی قسم کی مالی مشکلات کا سامنا نہ کرنا پڑے۔
عیدالفطر کے موقع پر عام طور پر گھریلو اخراجات میں اضافہ ہو جاتا ہے جس کے باعث ملازمین کو اضافی وسائل درکار ہوتے ہیں، اسی ضرورت کو مدنظر رکھتے ہوئے صوبائی حکومت نے تنخواہوں اور پنشن کی قبل از وقت ادائیگی کا فیصلہ کیا ہے۔
ذرائع کے مطابق متعلقہ محکموں کو ہدایات جاری کر دی گئی ہیں کہ تمام ادائیگیوں کے انتظامات بروقت مکمل کیے جائیں تاکہ مقررہ تاریخ پر ملازمین اور پنشنرز کو رقم کی ادائیگی یقینی بنائی جا سکے۔
اس حوالے سے فنانس ڈیپارٹمنٹ کو بھی ضروری اقدامات کرنے کی ہدایت دی گئی ہے تاکہ ادائیگیوں کے عمل میں کسی قسم کی تاخیر نہ ہو۔
