ڈی آئی جی آپریشنز فیصل کامران نے اس سلسلے میں اہم بیان جاری کرتے ہوئے کہا کہ مقررہ وقت کے بعد پتنگ اڑانے والوں کیخلاف سخت قانونی کارروائی کی جائے گی۔

ڈی آئی جی نے بتایا کہ بسنت کے دوران شہر میں ڈرون کیمروں کے ذریعے پتنگ بازی کی نگرانی کی جا رہی ہے۔ اب تک قانون کی خلاف ورزی کرنے والے 1700 سے زائد افراد کیخلاف مقدمات درج کیے جا چکے ہیں۔

انہوں نے پولیس اہلکاروں کو ہدایت کی کہ ہوائی فائرنگ اور کیمیکل ڈور استعمال کرنے والوں کیخلاف زیرو ٹالرنس پالیسی اپنائی جائے۔

شہر میں شہریوں کی حفاظت کیلئے 10 ہزار سے زائد پولیس اہلکار تعینات کیے گئے ہیں، جبکہ موٹر سائیکل سواروں کو سیفٹی گارڈز استعمال کرنے کی سخت ہدایات جاری کی گئی ہیں۔ ڈی آئی جی نے شہریوں پر زور دیا کہ وہ صرف حکومت سے منظور شدہ ڈور اور پتنگیں استعمال کریں تاکہ حادثات سے بچا جا سکے۔

یہ بھی پڑھیں:اسلام آباد راولپنڈی میٹرو بس سروس مکمل بند

واضح رہے کہ لاہور میں بسنت منانے کا تہوار 6 فروری سے 8 فروری 2026 تک ہے۔ پنجاب حکومت نے طویل عرصے بعد مخصوص ضابطہ اخلاق کے تحت بسنت کی اجازت دی ہے، جس میں شہریوں کی حفاظت اور قانون کی پاسداری کو اولین ترجیح دی گئی ہے۔

ان پابندیوں اور حفاظتی اقدامات کا مقصد نہ صرف شہریوں کی جان و مال کی حفاظت ہے بلکہ بسنت کے تہوار کو محفوظ اور خوشگوار ماحول میں منانا بھی ہے۔