اس اسکیم کا مقصد صوبے بھر کی مستحق بیوہ خواتین کو براہِ راست مالی معاونت فراہم کرنا ہے تاکہ وہ اور ان کے بچے بہتر زندگی گزار سکیں۔
یہ اسکیم زکوٰۃ اینڈ ویلفیئر ڈیپارٹمنٹ کے تحت نافذ کی جائے گی، پروگرام کے ذریعے ہر مستحق بیوہ خاتون کو ایک لاکھ روپے نقد فراہم کیے جائیں گے۔
اس کے علاوہ بچوں کی تعداد کے مطابق اضافی امداد بھی دی جائے گی، اگر بیوہ خاتون کا ایک بچہ ہے تو انہیں مزید 25 ہزار روپے دیے جائیں گے، جبکہ دو بچوں کی صورت میں 50 ہزار روپے اضافی فراہم کیے جائیں گے۔
حکام کے مطابق اس اسکیم کا بنیادی مقصد بیوہ خواتین پر موجود مالی دباؤ کم کرنا اور ان کے بچوں کی خوراک، تعلیم اور دیگر بنیادی ضروریات پوری کرنے میں مدد دینا ہے۔ اس اقدام سے نہ صرف بیوہ خواتین کو معاشی سہارا ملے گا بلکہ وہ امدادی اداروں پر انحصار کم کر کے خود مختاری کی جانب بڑھ سکیں گی۔
یہ بھی پڑھیں: سب سے طویل اور مختصر روزہ کن ممالک میں ہوگا؟ جانیے
زکوٰۃ اینڈ ویلفیئر ڈیپارٹمنٹ کا کہنا ہے کہ اس اسکیم کیلئے 4 ارب روپے مختص کیے گئے ہیں، اس عمل میں شفاف طریقہ کار کے تحت مستحقین کا انتخاب کیا جائے گا تاکہ امداد حقیقی حق داروں تک پہنچ سکے۔
ذرائع کے مطابق بیوہ سپورٹ کارڈ اسکیم کے رواں ماہ کے اختتام تک باقاعدہ طور پر نافذ ہونے کی توقع ہے، جلد ہی رجسٹریشن کا طریقہ کار جاری کیا جائے گا، جس کے بعد مستحق بیوہ خواتین کو مالی معاونت کی فراہمی شروع کر دی جائے گی۔
