محکمہ موسمیات کے مطابق بارش کے بعد کوئٹہ سے آنے والی سرد ہوائیں کراچی میں 20 سے 22 کلومیٹر فی گھنٹہ کی رفتار سے چل رہی ہیں، جس کے باعث موسم خاصا ٹھنڈا محسوس کیا جا رہا ہے۔

موسمی ماہرین کا کہنا ہے کہ کل ان ہواؤں کی رفتار بڑھ کر 30 سے 35 کلومیٹر فی گھنٹہ تک پہنچ سکتی ہے، جس سے سردی کی شدت میں مزید اضافہ ہوگا اور درجہ حرارت معمول سے کم محسوس ہوگا۔

محکمہ موسمیات کی جانب سے پیشگوئی کی گئی کہ کراچی میں رواں ماہ کے آخر تک موسم سرد رہ سکتا ہے۔ اس دوران رات کے وقت درجہ حرارت 9 سے 12 ڈگری سینٹی گریڈ جبکہ دن کے اوقات میں 22 سے 24 ڈگری سینٹی گریڈ کے درمیان رہنے کا امکان ہے۔ سرد ہواؤں کے باعث بالخصوص صبح اور رات کے وقت خنکی زیادہ محسوس کی جائے گی۔

یہ بھی پڑھیں:تیز بارش اور شدید برفباری، محکمہ موسمیات نے خبردار کر دیا

مزید بتایا گیا کہ 27 یا 28 جنوری کے دوران مغربی ہواؤں کا ایک نیا سسٹم ملک کے شمالی علاقوں پر اثر انداز ہو سکتا ہے، تاہم اس سسٹم کے باعث سندھ میں بارش کا کوئی امکان نہیں۔ کراچی میں اس دوران مطلع جزوی طور پر ابرآلود رہنے کی توقع ہے۔

محکمہ موسمیات کی جانب سے شہریوں کو ہدایت کی گئی ہے کہ سرد موسم کے پیش نظر احتیاطی تدابیر اختیار کریں، خصوصاً بزرگوں اور بچوں کو ٹھنڈی ہواؤں سے محفوظ رکھا جائے۔