مریم نواز ہنرمند نوجوان پروگرام کے راؤنڈ 3 کے تحت خواتین کیلئے ایک منفرد ڈیجیٹل سکلز پروگرام کا اعلان کیا گیا ہے، جس میں منتخب امیدواروں کو ماہانہ 12 ہزار روپے وظیفہ دیا جائے گا۔

پنجاب سکلز ڈیولپمنٹ فنڈ کے مطابق یہ اپنی نوعیت کا پہلا پروگرام ہے جو خاص طور پر دیہی علاقوں سے تعلق رکھنے والی تعلیم یافتہ خواتین کیلئے تیار کیا گیا ہے۔

اس پروگرام کا مقصد خواتین کو گھر بیٹھے جدید ڈیجیٹل مہارتیں سکھا کر باعزت روزگار کے مواقع فراہم کرنا ہے۔ پروگرام کے تحت شرکاء کو 6 ماہ کی انسٹرکٹر کی زیر نگرانی، تصدیق شدہ ڈیجیٹل ٹریننگ دی جائے گی۔

تربیت کے دوران خواتین کو 5 ہزار روپے ماہانہ وظیفہ جبکہ 7 ہزار روپے انٹرنیٹ اور ڈیوائس الاؤنس دیا جائے گا تاکہ وہ بغیر کسی رکاوٹ کے اپنی ٹریننگ مکمل کر سکیں۔ اس کے علاوہ پروگرام میں کیریئر کونسلنگ، مستقل رہنمائی، فری لانسنگ، ریموٹ ورک اور ای کامرس کے مواقع بھی فراہم کیے جائیں گے، جس سے خواتین مالی خودمختاری حاصل کر سکیں گی۔

یہ بھی پڑھیں:حکومت کا بیرون ملک نوکری کے خواہشمند کی مالی معاونت کا اعلان

اہلیت کے مطابق درخواست دینے والی خواتین کے پاس کم از کم 16 سال کی تعلیم ہونی چاہیے، وہ دیہی پنجاب کی رہائشی ہوں، عمر 21 سے 40 سال کے درمیان ہو اور انٹری ٹیسٹ پاس کرنا لازمی ہوگا۔ اس پروگرام کیلئے درخواست جمع کرانے کی آخری تاریخ 20 جنوری 2026 مقرر کی گئی ہے۔