وزیر بلدیات سندھ ناصر حسین شاہ کی زیر صدارت اجلاس میں فیصلہ کیا گیا کہ شہر میں کچرا جلانے والوں کے خلاف ایف آئی آر درج کی جائے گی۔ کراچی میں 14 ہزار ٹن سے زائد کچرا ہوتا ہے صرف ضلع وسطی میں ہی یومیہ تین ہزار ٹن کچرا ہوتا ہے۔

یہ بھی پڑھیں: 24 گھنٹوں کیلیے گیس کی فراہمی بند کرنے کا اعلان

سندھ سالڈ ویسٹ مینجمنٹ بورڈ کے منیجنگ ڈائریکٹر طارق علی نظامانی نے کہا کہ دو روز قبل وزیر بلدیات کی زیر صدارت اجلاس ہوا تھا جس میں ٹاؤن چیئرمین نے کچرا جلانے کے حوالے سے شکایت کی تھی۔ انہوں نے کہا کہ ناصر حسین شاہ نے احکامات دیے ہیں کہ جہاں پر بھی اس قسم کے واقعات ہوں گے ان کے خلاف ایف آئی آر درج ہوگی اور گرفتار بھی کیا جائے گا۔

طارق نظامانی نے کہا کہ کمشنر آفس سے دفعہ 144 کا نفاذ کرواتے رہے ہیں اور ہمارے اس قسم کے واقعات کے خلاف اقدامات کیے جارہے ہیں، کچھ لوگ لاعلمی میں کچرا جلادیتے ہیں جنہیں ماحولیاتی آلودگی کا علم نہیں ہوتا۔
انہوں نے کہا کہ پہلے ڈی ایم سیز یہ معاملات دیکھتی تھیں تو تین ہزار سے زائد کچرا کنڈیاں ہوتی تھیں، ہم نے تقریباً 25 سو سے زائد ایسے واقعات کو روک چکے ہیں۔