ڈیرہ میں میڈیا سے گفتگو کرتے ہوئے سابق وزیراعلیٰ خیبرپختونخوا علی امین گنڈاپور کا کہنا تھا کہ ایک میلے کے دوران چیئرمین سینیٹ سید یوسف رضا گیلانی اور گورنر پنجاب سلیم حیدر میری ملاقات پر پراپیگنڈا کیا گیا، میں کہیں نہیں جارہا عمران خان کے ساتھ کھڑا ہوں۔

انہوں نے کہا کہ مجھے کسی کا کوئی خوف اور ڈر نہیں، جب کہیں جاؤں گا تو بتا کر جاؤں گا، پراپیگنڈا اور ڈرامے بازیاں چھوڑ کر عوام کی خدمت اور فلاح و بہبود پر توجہ دی جائے، میں جب تک زندہ ہوں پاکستان تحریک انصاف اور عمران خان کے ساتھ کھڑا ہوں اور کھڑا رہوں گا۔

علی امین گنڈاپور کا کہنا تھا کہ عمران خان کو انصاف نہیں مل رہا، آئین و قانون اور عدالتی احکامات کا مذاق اڑایا جا رہا ہے، تحریک انصاف اور عمران خان کے خلاف تمام غیر جمہوری اقدامات کی سخت ترین الفاظ میں مذمت کرتا ہوں۔

یہ بھی پڑھیں: پی ٹی آئی کے 70 اراکین صوبائی اسمبلی اسلام آباد پولیس کو مطلوب

سابق وزیراعلیٰ خیبرپختونخوا نے کہا کہ اگر اہلخانہ کی ملاقات طے ہے تو بانی پی ٹی آئی سے ملاقات کرائی جائے، عمران خان ناحق قید اور جھوٹے و جعلی مقدمات کا سامنا ہے، پی ٹی آئی کے خلاف فسطائیت کوئی نئی بات نہیں ہے یہ سلسلہ ایک طویل عرصے سے جاری ہے۔

ان کا مزید کہنا تھا کہ سہیل آفریدی میرا بھائی ہے اور اب وہ وزیراعلیٰ ہے، میرے دور کے تمام منصوبے آج بھی جاری ہیں۔