سیکرٹری جنرل پاکستان تحریک انصاف بیرسٹر سلمان اکرم راجہ کی ہدایت پر پارٹی آئین کا تفصیلی جائزہ لینے کے لیے خصوصی کمیٹی قائم کر دی گئی جس کا باضابطہ نوٹیفکیشن بھی جاری کردیا گیا۔
نوٹیفکیشن کے مطابق پارٹی آئین کے جائزہ کے لیے قائم سینئر و اہم رہنماؤں پر مشتمل کمیٹی میں بیرسٹر گوہر، سلمان اکرم راجہ، سابق صدر ڈاکٹر عارف علوی، حمید خان، اسد قیصر، رؤف حسن اور فردوس شمیم نقوی شامل ہیں۔
کمیٹی کو پارٹی آئین میں موجود تمام خامیوں کو دور کرنے اور اسے دیگر سیاسی جماعتوں کے آئین کے تقابلی معیار کے مطابق لانے کا ٹاسک تفویض کیا گیا ہے۔
یہ بھی پڑھیں: پی ٹی آئی سیاسی مفاہمت کیلئے ایک قدم بڑھنے کو تیار
نوٹیفکیشن کے مطابق الیکشن کمیشن آف پاکستان کے ممکنہ اعتراضات سے بچنے اور قانونی و آئینی تقاضوں کو پورا کرنے کے لیے پارٹی آئین میں ضروری اصلاحات کو ناگزیر قرار دیا گیا ہے۔
کمیٹی کو ہدایت کی گئی ہے کہ وہ جلد از جلد پارٹی آئین پر اپنا کام مکمل کرے اور 10 روز کے اندر اپنی سفارشات پیش کرے جبکہ آئینی جائزہ کمیٹی کی سفارشات اس سلسلے میں اہم کردار ادا کریں گی۔
سینئر رہنماؤں پر مشتمل کمیٹی اپنی رپورٹ پیش کرنے کے بعد پارٹی آئین کو جدید خطوط پر استوار کرنے اور انٹرا پارٹی انتخابات کے نئے لائحہ عمل کے لیے بنیاد فراہم کرے گی۔
