تفصیلات کے مطابق وزیرداخلہ محسن نقوی سے برطانوی ہائی کمشنرجین میریٹ کی ملاقات ہوئی جس میں پاک برطانیہ تعلقات، سیکیورٹی تعاون اور باہمی دلچسپی کے امور پر تفصیلی گفتگو کی گئی۔ برطانیہ میں غیر قانونی طور پر مقیم پاکستانیوں کی وطن واپسی کےامور پر بھی بات چیت ہوئی۔
وزیر داخلہ نے شہزاد اکبر اور عادل راجہ کے حکومت پاکستان کی طرف سے حوالگی کے کاغذات جین میریٹ کے حوالے کیے، شہزاد اکبر اور عادل راجہ کو فوری طور پر پاکستان کے حوالے کرنے سے متعلق گفتگو کی گئی۔
یہ بھی پڑھیں: چیف آف ڈیفنس فورسز سے متعلق نوٹیفکیشن جعلی قرار
اس موقع پر محسن نقوی نے کہا کہ دونوں افراد مطلوب ہیں ان کو فوری طور پر پاکستان کے حوالے کیا جائے، پروپیگنڈا کرنے والے پاکستانی شہریوں کیخلاف ٹھوس شواہد بھی فراہم کئے، آزادی اظہار پر پورا یقین رکھتے ہیں لیکن فیک نیوز ہر ملک کے لئے مسئلہ ہے، بیرون ملک بیٹھ کرریاست اوراداروں کیخلاف ہرزہ سرائی کی کوئی ملک اجازت نہیں دے سکتا۔
ان کا کہنا تھا کہ پاکستان مخالف پروپیگنڈاکرنیوالوں کی واپسی کیلئے برطانوی تعاون کاخیر مقدم کریں گے۔
دوسری جانب وزارت داخلہ نے بذریعہ وزارت خارجہ بھی حوالگی کا پروسس شروع کر دیا ہے، ملاقات میں وفاقی سیکرٹری داخلہ محمد خرم آغا اور دیگر متعلقہ افسران بھی اس موقع پر موجود تھے۔
