پارلیمنٹ ہاؤس کے باہر میڈیا سے گفتگو میں فیصل واوڈا نے کہا کہ سیف اللہ ابڑو اور احمد ملک اُن کے بھائی ہیں، ابھی ان کے ساتھ ناشتہ کر کے آرہا ہوں۔ صحافی نے سوال کیا کہ ناشتہ کہاں کیا ؟ جس پر واوڈا نے جواب دیا کہ وہ دونوں اس وقت میرے گھر میں ہیں، آج ووٹ دیں گے، ایک نہیں بلکہ مزید تین لوگ بھی ووٹ دینے کو تیار ہیں۔

یہ بھی پڑھیں: ہم احتجاج کر کے حکومت کا راستہ روکیں گے: محمود اچکزئی

صحافی کے مزید سوال پر انہوں نے بتایا کہ وہ تین افراد پارلیمنٹ میں موجود ہیں۔ فیصل واوڈا کا کہنا تھا کہ ہمیں لکھنے پڑھنے کی عادت نہیں، غلطیاں ہو جاتی ہیں، یہ ہمارا جمہوری حق ہے۔ قومہ، فل اسٹاپ کی غلطیاں درست کر کے دوبارہ پیش کر دیں، آج مٹھائی بنتی ہی نہیں۔

فیصل واوڈا نے وزیراعلیٰ خیبرپختونخوا کے امن جرگہ اقدام کو سراہتے ہوئے کہا کہ صوبائی حکومت کو اعتماد میں لینا چاہیے۔ انہوں نے مزید کہا کہ سہیل آفریدی وزیر اعظم اور صدر سے ملاقات کریں تاکہ بانی پی ٹی آئی عمران خان کے لیے سازگار ماحول پیدا ہو۔

سینیٹر کا کہنا تھا کہ آنے والے دنوں میں چائے کی پیالی میں طوفان لانے کی کوشش کی جائے گی، تاہم وہ چاہتے ہیں کہ عمران خان باہر آئیں، کیونکہ ان کی نظر میں یہ موجودہ صورتحال مناسب نہیں۔ انہوں نے دعویٰ کیا کہ وہ بانی پی ٹی آئی کے خیر خواہ ہیں۔