حکومت سندھ کی جانب سے جاری کردہ نوٹیفکیشن میں کہا گیا کہ تمام متعلقہ محکمے قواعد و ضوابط کے مطابق بھرتیوں کے عمل کا آغاز کریں گے، تمام امیدوار اپنی پروفائل www.sjp.gos.pkپر بنا کر دستاویزات اپ لوڈ کر کے آن لائن درخواست دے سکتے ہیں۔ یہ پلیٹ فارم امیدواروں کو شفاف اور آسان طریقے سے بھرتیوں میں حصہ لینے کی سہولت فراہم کرتا ہے۔

یاد رہے کہ 28 اکتوبر کو وزیراعلیٰ سندھ مراد علی شاہ نے کراچی میں سندھ جاب پورٹل (SJP) کا افتتاح کیا تھا، جس کے ذریعے سندھ پاکستان کا پہلا صوبہ بن گیا جس نے حکومتی ملازمتوں کیلئے مرکزی آن لائن پلیٹ فارم متعارف کرایا۔

یہ پورٹل سائنس اور انفارمیشن ٹیکنالوجی ڈیپارٹمنٹ اور سکھر آئی بی اے یونیورسٹی کے اشتراک سے تیار کیا گیا، جس پر امیدوار رجسٹریشن، دستاویزات اپ لوڈ اور مختلف محکموں میں شفاف درخواستیں دے سکتے ہیں۔

یہ بھی پڑھیں:حکومت نے اوورسیز پاکستانیوں کی بڑی مشکل آسان کر دی

افتتاحی تقریب میں وزیراعلیٰ سندھ نے کہا تھا کہ یہ اقدام شهید محترمہ بینظیر بھٹو کے وژن کے مطابق مساوی مواقع اور شفاف بھرتی کیلئے اٹھایا گیا ہے۔

وزیراعلیٰ کا مزید کہنا تھا کہ پورٹل میں آن لائن ٹیسٹ شیڈولنگ، فوری نتائج کی اپ ڈیٹ اور محکمہ خزانہ کے ساتھ مربوط نظام شامل ہے تاکہ بھرتی کے عمل میں کسی بھی قسم کی تاخیر نہ ہو۔