وزیراعلیٰ کی جانب سے وزراء کی منظوری کے لیے سمری گورنر خیبرپختونخوا فیصل کریم کنڈی کو بھجوائی گئی، جس پر گورنر نے فوری دستخط کر دیئے۔ گورنر ہاؤس کے ترجمان کے مطابق وزراء کی سمری کی منظوری کے بعد حلف برداری کی تقریب آج سہ پہر 3 بجے گورنر ہاؤس پشاور میں منعقد ہوگی۔

یہ بھی پڑھیں:  پی ٹی آئی کے حمایت یافتہ آزاد امیدوار فاتح قرار

ذرائع کے مطابق ابتدائی طور پر کابینہ میں 10 وزراء، 2 مشیران اور ایک معاونِ خصوصی کو شامل کیا گیا ہے۔ کابینہ کے ارکان کا انتخاب پارٹی قیادت اور اتحادی جماعتوں کی مشاورت سے کیا گیا تاکہ حکومت کے مختلف محاذوں پر توازن برقرار رکھا جا سکے۔ سرکاری دستاویزات کے مطابق مینا خان اور خلیق الرحمن کو کابینہ میں بطور وزیر شامل کیا گیا ہے، جبکہ فضل شکور، ڈاکٹر امجد اور ارشد ایواب کو بھی اہم قلمدان سونپے جا رہے ہیں۔

اسی طرح ریاض خان، افتاب عالم، فخر جہان، فیصل ترکئی اور عاقب اللہ بھی کابینہ کے مستقل رکن ہوں گے۔ معیشت اور پالیسی سازی کے حوالے سے مزمل اسلم کو خصوصی حیثیت دی گئی ہے، جو حکومت کی مالی پالیسیوں اور معاشی اصلاحات کے معاملات دیکھیں گے۔ اس کے علاوہ تاج محمد اور شفیع اللہ جان کو بھی کابینہ میں شامل کیا گیا ہے تاکہ مختلف اضلاع اور جماعتی حلقوں کی نمائندگی ممکن بنائی جا سکے۔

ذرائع کے مطابق وزیراعلیٰ سہیل آفریدی نے کابینہ کی تشکیل میں کارکردگی، سیاسی وابستگی اور علاقائی توازن کو مدنظر رکھا ہے۔ ان کا کہنا ہے کہ نئی کابینہ عوامی خدمت اور صوبے کی ترقی کے ایجنڈے کو آگے بڑھائے گی۔ وزیراعلیٰ نے عندیہ دیا ہے کہ جلد ہی باقی محکموں کے لیے بھی مزید ناموں پر غور کیا جائے گا تاکہ حکومت کے تمام شعبوں میں مؤثر نگرانی ممکن ہو۔