پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز کے بلوچستان کے علاقوں کوئٹہ اور بولیدہ میں 28 اور 29 اکتوبر کو دو الگ الگ کارروائیوں میں بھارتی حمایت یافتہ فتنہ الہندوستان سے تعلق رکھنے والے 18 دہشت گرد مارے گئے۔

آئی ایس پی آر کے مطابق سیکیورٹی فورسز نے دہشت گردوں کی موجودگی کی اطلاع پر کوئٹہ کے علاقے چلتن کی پہاڑیوں میں انٹیلی جنس بیسڈ آپریشن کیا، آپریشن کے دوران سیکیورٹی فورسز نے مؤثر طریقے سے دہشت گردوں کے ٹھکانے کو نشانہ بنایا۔

یہ بھی پڑھیں: جعفر ایکسپریس پر نامعلوم افراد کا راکٹوں سے حملہ

ترجمان کا کہنا ہے کہ شدید فائرنگ کے تبادلے کے بعد 14 ہندوستانی اسپانسرڈ دہشت گرد مارے گئے، سیکیورٹی فورسز نے ضلع کیچ کے علاقے بلیدہ میں کئے گئے ایک اور انٹیلی جنس بیسڈ آپریشن میں دہشت گردوں کے ایک ٹھکانے کو نشانہ بنایا۔ جس کے دوران 4 دہشت گرد مارے گئے، ہلاک دہشت گردوں سے اسلحہ، گولہ بارود اور دھماکہ خیز مواد بھی برآمد ہوا، ہلاک دہشت گرد متعدد دہشت گرد کارروائیوں میں ملوث تھے۔

آئی ایس پی آر کے مطابق علاقے میں کسی بھی ممکنہ ہندوستانی اسپانسرڈ دہشت گرد کو ختم کرنے کے لیے کلئیرنس آپریشن جاری ہے، سیکیورٹی فورسز اور قانون نافذ کرنے والے ادار ے وژن "عزم استحکام” کے تحت انسداد دہشت گردی مہم بھرپور انداز میں جاری رکھیں گی۔