عالمی ماحولیاتی ادارے آئی کیو ایئر کے مطابق جمعرات کی صبح لاہور کا مجموعی ایئر کوالٹی انڈکس 603 ریکارڈ کیا گیا، جو انسانی صحت کیلئے انتہائی خطرناک سطح ہے، بھارتی دارالحکومت دہلی کا اے کیو آئی 473 رہا۔ محکمہ ماحولیات پنجاب کے اعداد و شمار کے مطابق صبح 6 بجے لاہور کے کئی علاقوں میں فضائی معیار خطرناک حد تک خراب تھا۔

یہ بھی پڑھیں: لاہورعالمی آلودگی انڈیکس میں نمبر 1 پر

سٹی سکول علامہ اقبال ٹاؤن لاہور کے علاقے میں اے کیو آئی 1059 تک جا پہنچا۔ ایف ایف پاکستان روڈ پر 1021، ایف ایف پاکستان ون 870، وائلد لائف اینڈ پارکس ساندہ روڈ پر 818، سٹی سکول پروگرام 780 اور پاکستان انجیئرنگ سروس میں 770 ریکارڈ ہوا۔ غازی روڈ انٹر چینج کے علاقے میں اے کیو آئی 758 رہا، نسبتاً بہتر فضا واہگہ بارڈر پر دیکھی گئی، جہاں یہ شرح 176 تھی۔ فیصل آباد میں 685، لاہور میں 603، گوجرانوالہ میں 555، بہاولپور میں 372، ملتان میں 364، پشاور میں 276، سیالکوٹ میں 244، ہوندل میں 210، اسلام آباد میں 188 اور کراچی میں 177 اے کیو آئی ریکارڈ کیا گیا۔

ایئر کوالٹی سے متعلق ڈیٹا فراہم کرنیوالے عالمی اداروں کے مطابق گزشتہ چار برسوں سے اکتوبر اور نومبر کے مہینے لاہور میں سب سے زیادہ آلودہ ثابت ہو رہے ہیں۔ کراچی کا فضائی معیار بھی خراب رہا اور آلودہ شہروں میں ساتویں نمبر پر آگیا۔

محکمہ ماحولیات نے صورتحال کے پیش نظر پبلک مقامات اور اہم شاہراہوں پر ڈرائی سویپنگ پر پابندی عائد کر دی، شاہراہوں کو دھونے کیلئے پہلے پانی کا سپرے کیا جائے گا۔ سپارکو کی سالانہ رپورٹ میں انکشاف کیا گیا ہے کہ رواں سال پنجاب میں فصل کی باقیات جلانے میں 65 فیصد کمی آ گئی ہے، گزشتہ برس پنجاب میں ماحولیاتی خلاف ورزیوں کا سکور 838 تھا جو رواں سال کم ہو کر 294 رہا۔ رپورٹ میں کہا گیا ہے کہ بھارتی علاقوں سے آنے والی آلودگی سے پاکستانی علاقوں میں سموگ کی صورتحال خراب ہو رہی ہے۔