پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے خیبرپختونخوا کے ضلع کرم کے علاقے دوگر میں خفیہ اطلاع پر آپریشن کے دوران بھارتی سپانسرڈ فتنہ الخوارج کے ٹھکانے پر کارروائی کی۔

آئی ایس پی آر کی جانب سے بتایا گیا کہ آپریشن کے دوران پاک فوج کی مؤثر کارروائی سے 7 بھارتی سپانسرڈ خوارج جہنم واصل ہو گئے، دہشت گردوں سے شدید فائرنگ کے تبادلے میں کیپٹن نعمان سلیم سمیت 6 جوان شہید ہو گئے۔

ترجمان پاک فوج کے مطابق شہداء میں کیپٹن نعمان سلیم، حوالدار امجد علی، نائیک وقاص احمد، سپاہی اعجاز علی، سپاہی محمد ولید اور سپاہی محمد شہباز شامل ہیں، شہید کیپٹن نعمان سلیم 24 سالہ میڈیکل آفیسر تھے اور ضلع میانوالی سے تعلق رکھتے تھے۔

یہ بھی پڑھیں: سکیورٹی فورسز کی کارروائی، 25 دہشتگرد ہلاک، 5 جوان شہید

صدرِ مملکت آصف علی زرداری نے دہشت گردوں کے خلاف آپریشن میں شہید ہونے والے جوانوں کو خراجِ عقیدت ، کیپٹن نعمان سلیم اور اُن کے پانچ ساتھیوں کی قربانی کو خراجِ تحسین پیش کیا، صدرِ مملکت نے دہشت گردوں کے خاتمے کے لیے سکیورٹی فورسز کے عزم، بہادری اور پیشہ ورانہ صلاحیتوں کو سراہا۔

صدر آصف علی زرداری کا کہنا تھا کہ قوم اپنے بہادر سپوتوں کی قربانیوں پر فخر کرتی ہے، وژن عزمِ استحکام کے تحت بھارت کے حمایت یافتہ فتنۂ الخوارج کے خلاف آپریشن دہشت گردی کے مکمل خاتمے تک جاری رہے گا، شہداء کی قربانیاں قومی اتحاد، سلامتی اور استحکام کی ضمانت ہیں۔

صدر مملکت نے شہداء کے اہلِ خانہ سے دلی ہمدردی کا اظہار کیا اور اُن کے لیے صبر و حوصلے کی دعا کی۔