صدر مسلم لیگ ن آزاد کشمیر شاہ غلام قادر نے کہا ہے کہ اگر پیپلز پارٹی آزاد کشمیر میں تحریک عدم اعتماد لاتی ہے تو یہ ان کا جمہوری حق ہے لیکن مسلم لیگ ن کسی نئی حکومت کا حصہ نہیں بنے گی۔
ان کا کہنا تھا کہ مسلم لیگ ن کسی غیر فطری حکومت سازی کا حصہ نہیں بنے گی اور اب اپوزیشن میں بیٹھے گی، جو بھی رکن پارٹی پالیسی سے انحراف کرے گا اسے پارٹی کی جانب سے کارروائی کا سامنا کرنا پڑے گا۔
شاہ غلام قادر نے کہا کہ نئی حکومت کا قیام صرف شفاف انتخابات سے ہی ممکن ہے، مسلم لیگ ن آزاد کشمیر مہاجرین اور بیرون ملک کشمیریوں کی فلاح کے لیے سرگرم ہے، مسلم لیگ ن آزاد کشمیر ایک منظم اور مقبول جماعت کے طور پر ابھری ہے۔
یہ بھی پڑھیں: وزیراعظم آزاد کشمیر کیخلاف تحریک عدم اعتماد لانے کا فیصلہ
صدر مسلم لیگ ن آزاد کشمیر کا مزید کہنا تھا کہ ہم آزاد کشمیر میں آئینی و سیاسی بحران کے حل کیلئے اپنا مثبت کردار ادا کرتے رہیں گے، آزاد کشمیر میں مضبوط حکومت صرف عام انتخابات سے قائم ہو سکتی ہے، پارٹی اپنے قائد میاں نواز شریف اور شہباز شریف کی قیادت میں بھرپور انتخابی مہم چلائے گی ۔
یاد رہے کہ گزشتہ دنوں پیپلزپارٹی نے وزیراعظم آزاد کشمیر چودھری انوارالحق کے خلاف تحریک عدم اعتماد لانے کا فیصلہ کیا تھا۔
