سیکرٹری جنرل پی ٹی آئی سلمان اکرم راجہ نے اسلام آباد ہائیکورٹ میں میڈیا سے گفتگو کرتے ہوئے کہا کہ عمران خان سے ملاقات کے معاملہ پر عدالتی احکامات کو نظر انداز کیا جارہا ہے، عدالتی احکامات کے باوجود بانی سے ملاقات میں رکاوٹیں ڈالی جاتی ہیں۔

انہوں نے کہا کہ عدالتی فیصلے کے مطابق منگل کو فیملی اور جمعرات وکلا کی بانی پی ٹی آئی عمران خان سے ملاقات کا دن مقرر ہے لیکن اکتوبر 2024ء سے عدالتی فیصلے پر عمل درآمد نہیں ہوا، 10 سے زائد مرتبہ توہین عدالت کی درخواستیں دائر کیں لیکن ہماری شنوائی نہیں ہوئی۔

سلمان اکرم راجہ کا کہنا تھا کہ اسلام آباد ہائی کورٹ کو پروا نہیں اس کے فیصلوں پر عمل ہورہا ہے یا نہیں ، اب ہمارے پاس سپریم کورٹ جانے کے علاوہ کوئی آپشن نہیں بچا، ہم عدالتوں کا دروازہ کھٹکھٹاتے رہیں گے یقین ہے ایک روز انصاف ضرور ملے گا۔

یہ بھی پڑھیں: تحریک انصاف کا 17 اکتوبر کو احتجاج کا اعلان

انہوں نے کہا کہ جنگ پر زیادہ بات نہیں کروں لیکن صورتحال انتہائی تشویش ناک ہے، دہشت گردوں کو کسی ایک شہر پر بمباری کرکے ختم نہیں کیا جا سکتا، ہمیں سوچنا چاہیے کہ خطے میں امن کیسے لایا جائے۔

سیکرٹری جنرل پی ٹی آئی کا مزید کہنا تھا کہ پاکستان اور افغانستان کے درمیان معاشی سمجھوتے کی صورت میں خطے کا امن ممکن ہے، بانی پی ٹی آئی کے سوا کوئی شخصیت نہیں جس کو تمام فریقین کا اعتماد حاصل ہو، اس وقت ایسے شخص کی ضرورت ہے جو جنگ کا خاتمہ کروا کر امن بحال کروائے۔