سکیورٹی ذرائع کی جانب سے بتایا گیا کہ ضلع مہمند میں سکیورٹی فورسز نے ایک بڑی کارروائی کے دوران پاکستان میں در اندازی کی کوشش ناکام بناتے ہوئے 45 سے 50 خوارج کو جہنم واصل کر دیا ہے۔

ذرائع نے بتایا کہ آپریشن خفیہ معلومات کی بنیاد پر کیا گیا جس میں خوارج کی بڑی تشکیل کو نشانہ بنایا گیا، کارروائی کے دوران کئی خوارج زخمی بھی ہوئے جبکہ پاک فوج نے علاقے کو گھیرے میں لے کر مکمل کلیئرنس آپریشن شروع کر رکھا ہے۔

سکیورٹی ذرائع کے مطابق آپریشن کے دوران فائرنگ کا تبادلہ کئی گھنٹوں سے جاری ہے، ہلاک ہونے والے خوارج افغانستان سے پاکستان میں دہشتگردانہ کارروائیاں سر انجام دینے آئے تھے۔

یہ بھی پڑھیں: سکیورٹی فورسز کی کارروائیاں، 34 خوارج ہلاک

واضح رہے کہ اس سے قبل سکیورٹی فورسز نے خیبرپختونخوا کے مختلف علاقوں میں خفیہ اطلاع پر آپریشن کرتے ہوئے 34 خوارج کو ہلاک کر دیا۔

آئی ایس پی آر کے مطابق سکیورٹی فورسز نے 13 تا 15 اکتوبر خیبرپختونخوا میں فتنہ الخوارج کے خلاف متعدد کارروائیاں کیں، سکیورٹی فورسز کی کامیاب کارروائیوں میں 34 خوارج جہنم واصل ہوگئے۔

شمالی وزیرستان کے علاقے اسپن وام میں خفیہ اطلاع پر آپریشن میں 18 خوارج واصلِ جہنم ہوئے جبکہ ایک اور آپریشن میں جنوبی وزیرستان میں کارروائی کے دوران 8 دہشتگرد مارے گئے، بنوں میں جھڑپ کے دوران مزید 8 خوارج انجام کو پہنچے۔