ذرائع وزارت مذہبی امور کے مطابق 17 اکتوبر کی شب وزارت کا پورٹل بند کر دیا جائے گا اور مزید بکنگ ممکن نہیں ہو گی، پرائیویٹ حج سکیم میں 16 ہزار نشستیں دستیاب ہیں، پرائیویٹ حج سکیم کے تحت عازمین کی بکنگ 17 اکتوبر تک جاری رہے گی۔

ذرائع کا بتانا ہے کہ پرائیویٹ حج اسکیم کے تحت 44 ہزار عازمین کی بکنگ مکمل ہو چکی ہے، پرائیویٹ حج اسکیم کے تحت 17 اکتوبر کے بعد بکنگ بند ہو جائے گی، سعودی وزارت حج کے احکامات کی روشنی میں پرائیویٹ اسکیم بکنگ کی مدت میں اضافہ ممکن نہیں۔

وزیر مذہبی امور سردار محمد یوسف نے نجی حج آپریٹرز کو بکنگ بروقت مکمل کرنے کی ہدایت کرتے ہوئے کہا ہے کہ بر وقت بکنگ مکمل کرنے کے لیے آگہی مہم چلائی جائے، وزارت مذہبی امور حج بکنگ میں تیزی کے لیے پرائیویٹ آپریٹرز کو تحریری ہدایت بھی دے چکی ہے۔

یہ بھی پڑھیں: دوسری قسط جمع نہ کرانے پر حج درخواست منسوخ تصور ہوگی

ذرائع کے مطابق پرائیویٹ حج اسکیم کے کی بکنگ کا آغاز 19 ستمبر کو کیا گیا تھا، 25 روز میں پرائیویٹ حج آپریٹرز تقریباً 23 ہزار عازمین کی بکنگ کر سکے، رواں سال گزشتہ برس محروم رہ جانے والے 21 ہزار 654 عازمین کو بھی حج پر بھجوایا جائے گا۔

وزارت مذہبی امور کے ذرائع نے مزید بتایا کہ رواں برس پرائیویٹ حج آپریٹرز کا کوٹہ 90 ہزار سے کم کر کے 60 ہزار کر دیا گیا، پرائیویٹ آپریٹرز مقرر کردہ حج کوٹے پر ہی بکنگ کر رہے ہیں۔