تفصیلات کے مطابق، راجپوت برادری کے درجنوں سرکردہ رہنماؤں اور کارکنان نے رانا خالد سعید کی سربراہی میں پاکستان پیپلز پارٹی میں باقاعدہ شمولیت اختیار کی۔ اس موقع پر ایک پروقار تقریب کا انعقاد کیا گیا جس میں پیپلز پارٹی کے مرکزی رہنما اور سیکرٹری اطلاعات ندیم افضل چن، ممبر قومی اسمبلی سید علی قاسم گیلانی اور پنجاب اسمبلی کے پارلیمانی لیڈر سید حسن مرتضیٰ نے شرکت کی۔

یہ بھی پڑھیں: پنجاب اسمبلی میں 8 پی ٹی آئی ارکان قائمہ کمیٹیوں سے مستعفی

پیپلز پارٹی کے رہنماؤں نے راجپوت برادری کے اس فیصلے کو خوش آئند قرار دیتے ہوئے کہا کہ یہ شمولیت پارٹی کے لیے نئی توانائی اور عوامی طاقت کا باعث بنے گی۔ ندیم افضل چن نے اپنے خطاب میں کہا کہ عوام اب روایتی سیاست سے تنگ آ چکے ہیں اور پیپلز پارٹی کی عوام دوست پالیسیوں کی طرف رجوع کر رہے ہیں۔ انہوں نے کہا کہ پارٹی چیئرمین بلاول بھٹو زرداری کی قیادت میں نوجوان نسل اور مختلف برادریاں پارٹی کے ساتھ جڑ رہی ہیں جو کہ مثبت تبدیلی کا اشارہ ہے۔
رانا خالد سعید نے اس موقع پر کہا کہ مسلم لیگ (ن) عوامی مسائل سے غافل ہو چکی ہے اور عام کارکنوں کو پارٹی میں کوئی جگہ نہیں دی جا رہی۔ انہوں نے کہا کہ پیپلز پارٹی نے ہمیشہ عوامی خدمت اور مزدور طبقے کی نمائندگی کی ہے، اسی لیے راجپوت برادری نے پارٹی قیادت پر اعتماد کا اظہار کیا ہے۔
سید علی قاسم گیلانی نے کہا کہ پنجاب میں پیپلز پارٹی ایک بار پھر مضبوط ہو رہی ہے اور آنے والے انتخابات میں حیران کن نتائج سامنے آئیں گے۔