وفاقی وزیرداخلہ محسن نقوی اور وزیر مملکت طلال چودھری نے فیض آباد کا دورہ کیا اور مختلف علاقوں میں سکیورٹی انتظامات کا جائزہ لیا ، آئی جی اسلام آبادپولیس سید علی ناصر رضوی، چیف کمشنر و ڈپٹی کمشنر اسلام آباد اور متعلقہ حکام بھی وزیر داخلہ کے ہمراہ تھے۔
وزیرداخلہ محسن نقوی نے رات گئے تک عوام کی جان و مال کے تحفظ کیلئے فرائض سرانجام دینے والےاسلام آباد پولیس و فیڈرل کانسٹیبلری کے جوانوں سے ملاقات کی اور ڈیوٹی پر موجود جوانوں کا حوصلہ بڑھایا۔
محسن نقوی نے فیڈرل کانسٹیبلری اور اسلام آباد پولیس کے جوانوں سے فرداً فرداً مصافحہ کیا اور ان کے جذبے کو سراہا، وزیرداخلہ نے جوانوں سے کھانے پینے کی فراہمی کے بارے بھی دریافت کیا۔
یہ بھی پڑھیں: اقصیٰ مارچ، راولپنڈی میں سکیورٹی اور ٹریفک پلان جاری
وزیر داخلہ محسن نقوی نے آئی جی اسلام آباد کو ہدایت کی کہ ڈیوٹی پر موجود جوانوں کا ہر طرح سے خیال رکھا جائے۔
ڈیوٹی پر معمور جوانوں سے گفتگو کرتے ہوئے محسن نقوی نے کہا کہ آپ سب پاکستان کے سپاہی ہیں ، قانون کی عملداری یقینی بنانے میں آپ کلیدی کردار ادا کر رہے ہیں۔
وزیر داخلہ محسن نقوی کا مزید کہنا تھا کہ کسی جتھے کو اسلام آباد یا کسی اور شہر پر چڑھائی کی کسی صورت اجازت نہیں دیں گے، کسی کو بھی قانون ہاتھ میں لینے کی اجازت نہیں دی جا سکتی۔
