صوبائی دارالحکومت لاہور میں توانائی کی بچت کے لیے ایک جدید لیبارٹری قائم کرنے کا فیصلہ کیا گیا ہے۔ حکام کے مطابق اس لیبارٹری کے قیام کا بنیادی مقصد مارکیٹ میں دستیاب غیر معیاری پنکھوں، بیٹریز اور سولر مصنوعات کے معیار کی جانچ کرنا ہے تاکہ صارفین کو بہتر اور مؤثر مصنوعات فراہم کی جا سکیں۔

یہ بھی پڑھیں: ڈرائیونگ لائسنس بنوانے والوں کیلئے بڑی خوشخبری

توانائی کے ماہرین کا کہنا ہے کہ مارکیٹ میں ناقص معیار کی مصنوعات کی بھرمار ہے جو کم کارکردگی کا باعث بننے کے ساتھ ساتھ بجلی کے بلوں میں اضافے کا سبب بھی بنتی ہیں۔ خاص طور پر غیر معیاری پنکھے اور بیٹریز زیادہ بجلی استعمال کرتے ہیں، جبکہ غیر معیاری سولر پینلز اور متعلقہ ٹیکنالوجی صارفین کے لیے خاطر خواہ نتائج فراہم کرنے میں ناکام رہتی ہیں۔ اس مسئلے کے حل کے لیے حکومت نے فیصلہ کیا ہے کہ نئی لیبارٹری میں ان مصنوعات کی باقاعدہ جانچ پڑتال کی جائے گی۔
منصوبے کے تحت بیٹری اور پنکھے بنانے والی فیکٹریوں میں استعمال ہونے والے آلات اور سولر ٹیکنالوجی کی مؤثر ٹیسٹنگ کی جائے گی۔ اس کے ساتھ ساتھ پہلے سے موجود سولر ٹیسٹنگ لیبز کو بھی اپ گریڈ کیا جائے گا تاکہ زیادہ جدید اور معیاری تحقیق اور جانچ ممکن ہو سکے۔ اس اقدام سے مقامی صنعت کو سہارا ملنے کے ساتھ ساتھ درآمدی مصنوعات پر انحصار میں کمی آئے گی اور ملکی معیشت کو فائدہ ہوگا۔
حکومت پنجاب نے اس منصوبے کی فزیبیلٹی کے لیے 16 کروڑ روپے جاری کر دیئے ہیں۔ حکام کا کہنا ہے کہ یہ سرمایہ کاری نہ صرف توانائی کی بچت کو فروغ دے گی بلکہ عوام کو سستی اور معیاری مصنوعات بھی فراہم کرے گی۔ اس فیصلے سے مقامی سطح پر تیار ہونے والی مصنوعات کے معیار میں بہتری آئے گی اور توانائی کے ضیاع میں نمایاں کمی واقع ہوگی۔