خاندانی ذرائع کے مطابق نواز شریف گزشتہ 7 دنوں سے جنیوا کے ایک معروف ہسپتال میں زیر علاج تھے جہاں ان کے دل کے حوالے سے ایک اہم پروسیجر کیا گیا۔ اس پروسیجر کے بعد ڈاکٹرز نے مسلسل کئی دن ان کی حالت پر نظر رکھی اور علاج مکمل ہونے کے بعد انہیں ہسپتال سے فارغ کر دیا گیا۔

یہ بھی پڑھیں: اقوام متحدہ جنرل اسمبلی اجلاس، وزیراعظم کا بھارتی صحافی کو کرارا جواب

ذرائع کا کہنا ہے کہ نواز شریف اب جنیوا کے ایک ہوٹل میں منتقل ہو گئے ہیں جہاں ان کے ساتھ ان کے بیٹے حسن نواز اور ذاتی معالج ڈاکٹر عدنان بھی موجود ہیں۔ خاندانی ذرائع نے یہ بھی تصدیق کی ہے کہ سابق وزیراعظم کی صحت اب ہر لحاظ سے بہتر ہے اور وہ تیزی سے صحتیاب ہو رہے ہیں۔ ان کا روزمرہ معائنہ بدستور جاری ہے تاکہ کسی بھی قسم کی پیچیدگی سے بروقت نمٹا جا سکے۔
قابل ذکر بات یہ ہے کہ نواز شریف کے علاج معالجے کے لیے وہی سرجن خدمات انجام دے رہے ہیں جو کئی برسوں سے ان کے معالج کے طور پر ذمہ داریاں نبھا رہے ہیں۔ ذرائع کا کہنا ہے کہ سرجن نے ان کے دل کا پروسیجر کامیابی سے مکمل کیا اور اب نواز شریف کو معمولاتِ زندگی کی طرف واپس لانے کے لیے مزید چند ہفتے آرام کرنے کی ہدایت دی گئی ہے۔
خاندانی ذرائع نے مزید بتایا کہ نواز شریف اس دوران محدود ملاقاتیں کریں گے اور اپنی صحت پر توجہ مرکوز رکھیں گے۔ اس حوالے سے پارٹی ذرائع کا بھی کہنا ہے کہ نواز شریف کی صحت میں بہتری پارٹی کارکنوں اور رہنماؤں کے لیے اطمینان بخش خبر ہے۔