وزیر اعلیٰ پنجاب مریم نواز کی زیر صدارت خصوصی اجلاس ہوا جس میں محکمہ صحت سے متعلق اہم فیصلےکیے گئے، اجلاس میں پنجاب کے پبلک اورپرائیویٹ میڈیکل اینڈڈینٹل کالجز کیلئے ایڈمشن پالیسی کی منظوری دی گئی جبکہ اوورسیز پاکستانیزکے بچوں کیلئے 20 ہزار ڈالر فیس مقرر کا فیصلہ کیا گیا۔

دوران اجلاس پنجاب کے سرکاری میڈیکل کالجز میں داخلے کیلئے ایم ڈی کیٹ ٹیسٹ پاس کرنا ضروری قرار دے دیا گیا ، پرائیویٹ میڈیکل کالج کی لسٹ میں نام آنے پر امیدوار کو یونیورسٹی آف ہیلتھ سائنسز میں ایک تہائی فیس جمع کرانا ہوگی۔

پرائیویٹ میڈیکل اینڈ ڈینٹل کالجزکی حتمی میرٹ لسٹ آنے کے بعد یو ایچ ایس متعلقہ کالج کو جمع شدہ ایک تہائی فیس ٹرانسفر کردے گی، داخلے کے خواہشمند طلبہ حتمی میرٹ لسٹ آنے پر متعلقہ پرائیویٹ میڈیکل اینڈ ڈینٹل کالج میں ہی باقی فیس جمع کرائیں گے۔

اجلاس میں پرائیویٹ ہسپتالوں میں پوسٹ گریجوایٹ ٹریننگ کے بعد لازمی سروس کی باہمی تجویز پر بھی اتفاق ہوا، سپیشلسٹ کی مانگ کے مطابق ٹرینی ڈاکٹر کوپرائیویٹ میڈیکل کالجز کے متعلقہ شعبے میں سپیشلائزیشن کیلئے بھیجا جائے گا۔

یہ بھی پڑھیں: خیبرپختونخوا کے مختلف علاقوں میں زلزلے کے شدید جھٹکے

دوران اجلاس وزیراعلیٰ مریم نوا ز نے ساہیوال میں پہلی کامیاب انجیو پلاسٹی پر اظہار مسرت کیا اور ساہیوال کے کارڈیک مرکزمیں سرجری کے آغازکو خوش آئند قراردیا، وزیراعلیٰ پنجاب نے میو ہسپتال کو ابلیشن سینٹر میں مریضوں کے علا ج کیلئے فول پروف اورشفاف طریقے کار وضع کرنے کی ہدایت بھی کی۔

وزیراعلیٰ مریم نواز نے کینسر کے مریضوں کو ہر صورت ریلیف دینے کی ہدایت کی جبکہ پنجاب میں نئے میڈیکل کالجز کی الگ بلڈنگ بنانے کے بجائے سرکاری یونیورسٹیوں میں ہی میڈیکل بلاک بنانے کی تجویز پر بھی اتفاق ہوا، اجلاس میں وزیراعلیٰ پنجاب نے صوبے کے مختلف اداروں کے بورڈ آف مینجمنٹ کی منظوری بھی دے دی۔

اس موقع پر گفتگو کرتے ہوئے وزیراعلیٰ پنجاب مریم نواز کا کہنا تھا کہ پنجاب کے ہر ہسپتال میں غریب مریض کو پیسے خرچ کیے بغیر علاج کی سہولت ملنی چاہیے، چاہتی ہوں کینسر کے ہر مریض کا علاج ممکن بنایا جائے۔

وزیراعلیٰ مریم نوازشریف نے نواز شریف میڈیکل سٹی کے جلد قیام کے لئے ضروری اقدامات کرنے کی بھی ہدایت کر دی۔