اس حوالے سے شہریوں کو یکم اکتوبر تک کی ڈیڈ لائن دی گئی ہے تاکہ وہ اپنے ڈرائیونگ لائسنس بنوا سکیں یا تجدید کروا لیں۔

چیف ٹریفک آفیسر (سی ٹی او) اسلام آباد حمزہ ہمایوں کی جانب سے واضح کیا گیا کہ یکم اکتوبر کے بعد لائسنس کے بغیر گاڑی یا موٹرسائیکل چلانے والوں کیخلاف مقدمات درج کیے جائیں گے۔ اس کے ساتھ ساتھ گاڑیاں بند کی جائیں گی اور ڈرائیورز کو گرفتار بھی کیا جائے گا۔

انہوں نے کہا کہ کارروائی بلاتفریق ہوگی اور کسی شہری کو رعایت نہیں دی جائے گی، چاہے وہ کسی بھی طبقے یا عہدے سے تعلق رکھتا ہو۔

سی ٹی او نے اس حوالے سے بات کرتے ہوئے کہا کہ یہ اقدام شہریوں کی حفاظت اور ٹریفک کے بہتر نظم و ضبط کیلئے اٹھایا جا رہا ہے۔ بغیر لائسنس ڈرائیونگ نہ صرف قانون کی خلاف ورزی ہے بلکہ حادثات اور قیمتی جانوں کے ضیاع کی بڑی وجہ بھی بنتی ہے۔

یہ بھی پڑھیں:وزیراعظم لیپ ٹاپ سکیم 2025 کا آغاز، اپلائی کا طریقہ جانیے

دوسری جانب آئی جی اسلام آباد علی ناصر رضوی نے بھی مثال قائم کرتے ہوئے اپنے ڈرائیونگ لائسنس کی تجدید کرا لی ہے اور شہریوں کو ہدایت دی ہے کہ وہ بھی مقررہ مدت میں اس عمل کو مکمل کریں تاکہ کسی بھی قسم کی قانونی کارروائی سے بچا جا سکے۔