اسلام آباد ہائی کورٹ میں شہری اسامہ خلجی کی جانب سے ایڈووکیٹ اسد لادھا کی وساطت سے دائر درخواست پر سماعت ہوئی، عدالت نے محفوظ کیا گیا فیصلہ آج جاری کردیا، جسٹس بابر ستار نے 99 صفحات پر مشتمل فیصلہ تحریری کیا۔

عدالتی فیصلے میں کہا گیا کہ چیئرمین پی ٹی اے کی تعیناتی قانونی طور پر درست نہیں ہوئی ، چیئرمین پی ٹی اے کو فوری عہدے سے ہٹایا جائے۔

عدالتی حکم میں مزید کہا گیا کہ پی ٹی اے میں سینئر ممبر کو عارضی طور پر چیئرمین پی ٹی اے تعینات کیا جائے۔

دوسری جانب چیئرمین پی ٹی اے میجر جنرل (ر) حفیظ الرحمان نے اسلام آباد ہائیکورٹ کی جانب سے عہدے سے ہٹائے جانے کے فیصلے کے خلاف انٹراکورٹ اپیل دائر کردی، چیئرمین پی ٹی اے نے انٹرا کورٹ اپیل آرڈیننس 1972ء کے تحت دائر کی ہے۔

یہ بھی پڑھیں: بی آئی ایس پی کے فنڈز سیلاب متاثرین کو منتقل کرنے کی تجویز

درخواست گزار کی جانب سے کہا گیا کہ اپیل کنندہ پاکستان ٹیلی کمیونی کیشن اتھارٹی (پی ٹی اے) کے موجودہ چیئرمین ہیں، چیئرمین پی ٹی اے کو پہلے 24 مئی 2023 کو پی ٹی اے میں ممبر (انتظامیہ) مقرر کیا گیا تھا،25 مئی 2023 کو انہیں چیئرمین پی ٹی اے کے طور پر تعینات کیا گیا۔

اپیل میں کہا گیا کہ چیئرمین پی ٹی اے میجر جنرل (ر) حفیظ الرحمان قوانین اور ضوابط کے مطابق اپنے کام انجام دے رہے ہیں، یہ اپیل چیئرمین پی ٹی اے کی قانونی تعیناتی کو ثابت کرنے کیلئے دائر کی گئی ہے۔

اپیل کنندہ چیئرمین پی ٹی اے میجر جنرل (ر) حفیظ الرحمان نے عدالت سے اپیل فوری طور پر سماعت کیلئے مقرر کرنے کی بھی درخواست کی ہے۔