وزیرِ اعظم شہباز شریف کی زیرِ صدارت سیلاب متاثرہ علاقوں میں بجلی کے بِلّوں کے حوالے سے اہم اجلاس ہوا جس میں اہم فیصلے کیے گئے۔

وزیرِ اعظم نے بجلی کی تقسیم کار کمپنیوں کو سیلاب زدہ علاقوں میں صارفین سے اگست 2025 کے بجلی کے بلوں کی وصولی سے فوری طور پر روک دیا۔

دوران اجلاس وزیراعظم شہباز شریف نے کہا کہ آئی ایم ایف کے ساتھ معاملات طے پانے کے بعد سیلاب متاثرہ علاقوں کیلئے بجلی کے بلوں کے حوالے سے تفصیلی پیکیج کا حتمی اعلان کیا جائے گا، جن سیلاب متاثرہ صارفین سے اگست 2025 کا بجلی کا بل وصول کیا جا چکا ہے وہ آئندہ ماہ ایڈجسٹ کردیا جائے گا۔

وزیراعظم کا کہنا تھا کہ سیلاب نے پورے پاکستان میں لاکھوں لوگوں کو متاثر کیا ہے، مشکل کے اس وقت میں عوام کے دکھوں پر مرحم رکھنے کی ہر ممکن کوشش کر رہے ہیں۔

محمد شہباز شریف نے مزید کہا کہ سیلاب متاثرین کے ریسکیو و بحالی کیلئے وفاقی و صوبائی ادارے اپنی تمام تر کوششیں کر رہے ہیں اور جب تک سیلاب متاثرین اپنے گھروں میں واپس نہیں چلے جاتے ہم چین سے نہیں بیٹھیں گے۔

یہ بھی پڑھیں: سیلاب متاثرین کو بجلی کے بلز میں ریلیف دینے کا اعلان

وفاقی وزیر بجلی اویس لغاری نے اپنے ایک بیان میں کہا کہ عوام دوست فیصلے پر وزیرِ اعظم شہباز شریف کے شکر گزار ہیں ، سیلاب متاثرہ علاقوں کے اگست کے بجلی بل معاف کر دیے گئے ہیں، جمع شدہ رقوم واپس ہوں گی ،پاور ڈویژن فوری طور پر اس پر عملدرآمد یقینی بنائے گا ۔

یاد رہے کہ گزشتہ دنوں وفاقی وزیر رانا تنویر حسین نے کہا تھا کہ حکومت فوری طور پر سیلاب متاثرین کے بجلی بلوں پر ٹیکس معاف کرے گی، جبکہ وفاقی سطح پر بلوں میں ریلیف دیا جائے گا اور لینڈ ریونیو کی معافی صوبائی حکومتوں کی ذمہ داری ہوگی۔

انہوں نے کہا کہ متاثرہ علاقوں میں جو اضافی بجلی کے بل موصول ہوئے ہیں وہ پہلے سے پرنٹ ہوچکے تھے، تاہم ان پر بھی نظرثانی کی جائے گی تاکہ عوام کو مزید مشکلات کا سامنا نہ ہو۔