ڈپٹی کمشنر سیالکوٹ صبا اصغر علی نے میڈیا سے گفتگو کے دوران بتایا کہ ضلع کے 80 سرکاری سکولوں کو بدستور 10 ستمبر تک بند رکھا جائے گا، کچھ سکول سیلابی پانی سے متاثرہوئے ہیں جبکہ کچھ میں پانی کھڑا ہے۔

انہوں نے بتایا کہ محکمہ سکول ایجوکیشن ڈیپارٹمنٹ کے مراسلہ کی روشنی میں ضلع کے 80 سرکاری سکولوں کو 10 ستمبر تک بند رکھنے کا فیصلہ کیا گیا ہے۔

ڈی سی سیالکوٹ کا کہنا تھا کہ تحصیل سیالکوٹ کے متعدد سکولز 8 تا 10 ستمبر بند رہیں گے، تحصیل ڈسکہ اور پسرور کے متاثرہ سرکاری سکولز بھی فہرست میں شامل ہیں جب کہ تحصیل سمبڑیال کے کئی سکولوں میں بھی تدریسی عمل عارضی طور پر معطل رہے گا۔

یہ بھی پڑھیں: بینظیر انکم سپورٹ کے نئے پروگرام میں شمولیت کا طریقہ کار کیا؟

دوسری جانب حکام نے سیلابی پانی سے سکولز کے احاطے متاثر ہونے اور حفاظتی نقطہ نظر سے سکولوں کی بندش ضروری قرار دیتے ہوئے کہا ہے کہ سیلاب کے بعد پیدا شدہ صورتحال میں والدین اور طلبہ انتظامیہ سے تعاون کریں، بچوں کی سلامتی اوّلین ترجیح ہے۔

واضح رہے کہ نئے حکم نامے کا اطلاق صرف سرکاری سکولوں پر ہوگا، ضلع کے تمام پرائیویٹ تعلیمی اداروں میں 5 ستمبر سے تعلیمی سرگرمیوں کا آغاز ہو چکا ہے۔