ڈپٹی کمشنر پاکپتن کی ہدایت پر محکمہ تعلیم نے باضابطہ نوٹیفکیشن جاری کر دیا، جس کے مطابق تحصیل کے 12 اسکول یکم ستمبر سے تا حکمِ ثانی بند رہیں گے۔

ڈپٹی کمشنر نے وضاحت کی کہ یہ اقدام بچوں اور اساتذہ کی جانوں کے تحفظ کلئے اٹھایا گیا ہے، سیلابی پانی کے باعث کئی علاقے اب بھی خطرے کی زد میں ہیں۔

ان کا کہنا تھا کہ عوام کی جان و مال کا تحفظ ضلعی انتظامیہ کی اولین ترجیح ہے، کسی بھی قیمت پر طلبہ کی زندگی کو خطرے میں نہیں ڈالا جا سکتا۔

محکمہ تعلیم کے مطابق متاثرہ اسکولوں کی فہرست متعلقہ اداروں کو فراہم کر دی گئی ہے اور والدین سے گزارش کی گئی ہے کہ وہ اس فیصلے پر مکمل عملدرآمد کریں۔

 انتظامیہ نے مزید کہا کہ حالات بہتر ہوتے ہی اسکول دوبارہ کھول دیے جائیں گے تاکہ بچوں کی تعلیم کا تسلسل برقرار رکھا جا سکے۔

یہ بھی پڑھیں:بارشیں سیلاب: مختلف علاقوں میں نادرا مراکز کی عارضی بندش

دوسری جانب سیلابی پانی سے دیہی علاقوں میں نظامِ زندگی مفلوج ہو چکا ہے، کئی دیہات میں تعلیمی سرگرمیاں شدید متاثر ہوئی ہیں۔

مقامی افراد کا کہنا ہے کہ حکومت کو متاثرہ اسکولوں کی بحالی اور صفائی ستھرائی کے فوری اقدامات بھی کرنے چاہئیں تاکہ بچے جلد اپنی تعلیم جاری رکھ سکیں۔

سیلاب کے باعث اسکولوں کی بندش وقتی ضرورت ہے، لیکن طویل مدت میں انتظامیہ کو تعلیمی اداروں کے تحفظ اور بحالی کیلئے ہنگامی منصوبہ بندی کرنا ہوگی۔