آزاد کشمیر کی اسٹیٹ ڈیزاسٹر مینجمنٹ اتھارٹی (ایس ڈی ایم اے) کی جانب سے بتایا گیا ہے کہ بھارتی مقبوضہ علاقے سے آزاد کشمیر میں دریائے جہلم میں پانی چھوڑا گیا ہے،بھارت کی طرف سے چھوڑا گیا پانی کا ریلہ کنٹرول لائن چکوٹھی کے مقام سے آزاد کشمیر میں داخل ہوا۔
ایس ڈی ایم اے کے مطابق مظفرآباد میں بھی دریائے جہلم میں پانی کے بہاؤ میں اضافہ ہو گیا جبکہ دریائے جہلم میں پانی کے بہاؤ کی مسلسل نگرانی کا عمل جاری ہے۔
ایس ڈی ایم اے کی جانب سے بتایا گیا ہے کہ دریائے جہلم میں چکوٹھی کے مقام سے پانی کی مقدار مسلسل بڑھ رہی ہے جس کے باعث آزاد کشمیر کے علاقوں مظفر آباد، ہٹیاں بالا اور نیچے کی طرف منگلا تک گردونواح میں پانی کی سطح بلند ہو سکتی ہے۔
یہ بھی پڑھیں: آئندہ چند روز میں دریائے راوی میں شدید سیلابی صورتحال کا الرٹ جاری
سٹیٹ ڈیزاسٹر مینجمنٹ اتھارٹی نے شہریوں سے اپیل کرتے ہوئے کہا ہے کہ موجودہ صورتحال کے تناظر میں شہری احتیاطی تدابیر اختیار کریں،دریا اور ندی نالوں کے کنارے غیر ضروری آمد و رفت سے گریز کریں۔
شہریوں کو ہدایت کی گئی ہے کہ مال مویشیوں اور قیمتی سامان کو بروقت محفوظ مقامات پر منتقل کر لیں اور بچوں کو دریاؤں و برساتی نالوں کے قریب ہرگز نہ جانے دیں۔
یاد رہے کہ اس سے قبل بھارت کی جانب سے پنجاب کے دریاؤں میں پانی چھوڑے جانے کے بعد تین بپھرے دریاؤں راوی، چناب اور ستلج نے تباہی مچا دی، دریاؤں کے کنارے آباد بستیاں اور فصلیں زیر آب آ گئیں جبکہ ہزاروں افراد نقل مکانی کرنے پر مجبور ہو گئے۔
