بانی پی ٹی آئی سے ملاقات کے بعد اڈیالہ جیل کے باہر میڈیا سے گفتگو کرتے ہوئے چیئرمین پاکستان تحریک انصاف بیرسٹر گوہر کا کہنا تھا کہ مجھے بہت خوشی ہوئی ہے آج تین ماہ کے بعد میں نے بانی پی ٹی آئی سے ملاقات کی،بہت اچھا لگا یہ ملاقاتیں جاری رہنی چاہئیں، ملاقاتوں پر پابندی نہیں ہونی چاہیے۔
انہوں نے کہا کہ اچھی بات ہونی چاہیے اور میں ہمیشہ مفاہمت کی کوشش کرتا ہوں، اگلے ماہ ستمبر میں ہم عدلیہ کی آزادی ، جمہوریت کی بحالی اور بانی پی ٹی آئی عمران خان کی رہائی کے لیے بہت بڑا جلسہ کرنے جارہے ہیں۔
چیئرمین پی ٹی آئی کا کہنا تھا کہ جیل میں بانی پی ٹی آئی کی سہولیات بحال کر دی گئی ہیں، انہیں اخبار بھی اب مہیا کیے جا رہے ہیں، آج کی ملاقات میں ملکی اور پارٹی امور سمیت کے پی کے میں سیلاب کی صورتحال پر گفتگو ہوئی ہے۔
بیرسٹر گوہر نے بتایا کہ بانی پی ٹی آئی عمران خان نے کے پی کے میں طوفانی بارشوں سے ہونے والی تباہی پر دکھ اور افسوس کا اظہار کیا ہے، بانی نے خیبرپختونخوا میں سیلاب متاثرین کی بحالی کے لیے بھرپور امدادی کارروائیوں کی ہدایت کی ہے۔
سیکرٹری جنرل پی ٹی آئی سلمان اکرم راجہ کے استعفیٰ سے متعلق پوچھے گئے ایک سوال کے جواب میں بیرسٹر گوہر کا کہنا تھا کہ سلمان اکرم راجہ نے استعفی دیا نہیں تھا زبانی تھا تو لہذا منظور یا مسترد ہونے کا معاملہ سامنے نہیں آیا۔
