فیصل آباد کی انسداد دہشت گردی عدالت نے 9 مئی کو وزیراعظم کے مشیر رانا ثناء اللہ کے گھر پر حملے کے مقدمہ کا فیصلہ سنا دیا۔

انسداد دہشت گردی عدالت کی جانب سے سابق اپوزیشن لیڈر قومی اسمبلی عمر ایوب اور سینیٹ میں سابق قائد حزب اختلاف شبلی فراز، سابق وفاقی وزیر زرتاج گل، کنول شوذب، ایم پی اے شیخ شاہد جاوید اور اسماعیل سیلا کو 10،10 سال قید کی سزا سنائی گئی۔

عدالت نے مقدمہ میں نامزد دیگر 16 ملزمان کو 3، 3 سال قید کی سزا سنائی جبکہ 34 ملزمان کو بری کر دیا گیا، اے ٹی سی کی جانب سے 109 ملزمان میں سے مجموعی طور پر 75 ملزمان کو سزائیں سنائی گئیں، تمام ملزمان کو ان کی غیر موجودگی میں سزا سنائی گئی۔

یہ بھی پڑھیں: عمران خان کی 9 مئی کے مقدمات میں ضمانتیں منظور

عدالت نے کیس کا فیصلہ سناتے ہوئے سابق وفاقی وزیر فواد چودھری اور پی ٹی آئی کے وائس چیئرمین شاہ محمود قریشی کے صاحبزادے زین قریشی کو بری کر دیا۔

یاد رہے کہ فیصل آباد میں 9 مئی کو جلاؤ گھیراؤ اور توڑ پھوڑ کے 4 مقدمات درج کیے گئے تھے جس میں سے 3 مقدمات کے فیصلے پہلے سنا دیئے گئے تھے جبکہ چوتھا مقدمہ رانا ثنا اللہ کے گھر پر حملے اور توڑ پھوڑ کا سمن آباد تھانے میں درج ہوا تھا جس میں پی ٹی آئی کی مرکزی قیادت سمیت 109 افراد کو نامزد کیا گیا تھا۔