پنجاب پولیس کو ٹریفک مینجمنٹ، حادثات پر قابو پانے، موسمیاتی صورت حال سے عوام کو پیشگی آگاہ کرنے کے نظام سے لیس کیا جائے گا، پہلے مرحلے میں لاہور میں پائلٹ پراجیکٹ شروع کیا جائے گا ، وزیراعلی مریم نواز دورہ جاپان سے واپسی پر منصوبے پر باضابطہ عمل درآمد کا آغاز کریں گی۔

وزیراعلی پنجاب مریم نواز شریف نے ٹوکیو میں نیشنل پولیس ایجنسی ہیڈ آفس کا دورہ کیا اور مختلف شعبوں کا معائنہ کیا، اس دوران وزیراعلیٰ پنجاب مریم نواز کو جاپان پولیس سسٹم کے نگران ادارے کے بارے میں بریفنگ دی گئی، وزیراعلیٰ مریم نواز نے نیشنل پولیس ایجنسی سسٹم کو سراہا۔

یہ بھی پڑھیں: پنجاب پولیس میں 27 ہزار نئی بھرتیوں کا اعلان

اس موقع پر گفتگو کرتے ہوئے وزیراعلیٰ پنجاب مریم نواز کا کہنا تھا کہ جاپان میں امن وامان کی صورتحال قابل تقلید ہے ، پنجاب میں پولیس کو جدید خطوط پر استوار کر رہے ہیں، پنجاب پولیس کو پیشہ وارانہ انداز میں کام کرنے کی آزادی دی ہے ۔

مریم نواز نے کہا کہ جرائم کے خاتمے کے لئے کرائم کنٹرول ڈیپارٹمنٹ کا نیا ادارہ قائم کیا ہے، کرائم کنٹرول ڈیپارٹمنٹ سے پنجاب میں امن وامان کی صورتحال بہتر ہوئی، کرائم کنٹرول ڈیپارٹمنٹ بننے کے بعد پنجاب میں پہلی مرتبہ جرائم کا گراف 70 فیصد سے بھی نیچے آچکا ہے، امن اور ترقی میرا مشن ہے۔