اے ڈی سی آر سیالکوٹ اقبال سنگھیڑا کو جسمانی ریمانڈ مکمل ہونے پر عدالت پیش کیا گیا، اینٹی کرپشن حکام کی جانب سے تفتیشی رپورٹ بھی عدالت میں جمع کرادی گئی۔

رپورٹ کے مطابق اے ڈی سی آر اقبال سنگھیڑا کو یکم اگست کو گرفتار کیا گیا ، اقبال سنگھیڑا کو 3 مرتبہ عدالت پیش کرکے 13 روز کا جسمانی ریمانڈ حاصل کیا ، جسمانی ریمانڈ کے دوران ملزم سے ایک لینڈ کروزر گاڑی برآمد کی گئی۔

محکمہ اینٹی کرپشن کی رپورٹ میں بتایا گیا کہ ملزم سے مدعی مقدمہ سے رشوت میں لی گئی قیمتی گھڑی بھی برآمد ہوئی ، اقبال سنگھیڑا سے 14 لاکھ 70 ہزار روپے اور 2 عدد 5 مرلہ کمرشل پلاٹس کی اوپن فائلز برآمد کیں۔

اینٹی کرپشن حکام نے عدالت میں جمع کرائی گئی رپورٹ میں مؤقف اپنایا کہ ملزم انتہائی ہوشیار اور چالاک ہے جو لیت و لعل اور حیلے بہانوں سے کام لے رہا ہے، ملزم اقبال سے مزید برآمدگی کی توقع نہیں ہے۔

تفتیشی حکام نے عدالت سے استدعا کی کہ ملزم کو 14 روزہ جوڈیشل ریمانڈ پر جیل بھجوانے کا حکم دیا جائے۔

بعدازاں عدالت نے اینٹی کرپشن ٹیم کی درخواست منظور کرتے ہوئے ملزم کو 14 روز کیلئے جوڈیشل ریمانڈ پر جیل بھیج دیا۔