محکمہ موسمیات اور نیشنل ڈیزاسٹر مینجمنٹ اتھارٹی (این ڈی ایم اے) نے شہریوں کو محتاط رہنے کی ہدایت جاری کر دی۔

تفصیلات کے مطابق این ڈی ایم اے کے ماہر محمد طیب نے بتایا کہ مغربی ہواؤں کا ایک نیا سلسلہ پاکستان کی طرف بڑھ رہا ہے، جس کے مشرقی ہواؤں سے ملاپ کے نتیجے میں مون سون بارشوں کی شدت میں مزید اضافہ ہوگا۔

ان کا کہنا تھا کہ یہ صورتحال میانوالی، چکوال، تلہ گنگ اور اٹک کیلئے خطرناک ثابت ہوسکتی ہے جہاں کلاؤڈ برسٹ اور اربن فلڈنگ کے امکانات ہیں۔

محکمہ موسمیات نے پیشگوئی کی ہے کہ 17 اگست سے بارشوں میں شدت آئے گی اور یہ سلسلہ 22 اگست تک جاری رہ سکتا ہے۔

حکام نے نشیبی علاقوں میں رہنے والے شہریوں کو الرٹ رہنے، دریاؤں اور برساتی نالوں کے قریب غیر ضروری نقل و حرکت سے گریز کرنے اور حفاظتی تدابیر اختیار کرنے کا مشورہ دیا ہے۔

این ڈی ایم اے نے ضلعی انتظامیہ کو بھی ہدایت کی ہے کہ وہ ایمرجنسی پلان کو فعال رکھیں تاکہ کسی بھی ہنگامی صورتحال میں فوری امدادی کارروائیاں یقینی بنائی جاسکیں۔

عوام سے کہا گیا ہے کہ وہ بارشوں کے دوران غیر ضروری سفر نہ کریں اور متعلقہ اداروں کی ہدایات پر عمل کریں تاکہ کسی بڑے نقصان سے بچا جا سکے۔