اس اجلاس کی صدارت سپیشل سیکرٹری ہاؤسنگ وقارعظیم نے کی۔ اجلاس میں پروگرام کے اہداف، پیش رفت اور آئندہ اقدامات پر تفصیلی تبادلہ خیال کیا گیا۔

اجلاس کو پی ڈی اپنی چھت اپنا گھر ولید بیگ نے پروگرام کے اہداف اور جاری پیش رفت سے آگاہ کیا۔ بتایا گیا کہ اکتوبر تک ایک لاکھ گھروں کے ہدف کو پورا کرنے کے لیے کام تیز کیا جائے گا۔ اب تک 75 ارب روپے سے زائد قرضہ جات مستحق خاندانوں میں تقسیم کیے جا چکے ہیں۔ مجموعی طور پر 9 ہزار سے زائد گھر مکمل ہو چکے ہیں جبکہ 56 ہزار سے زائد گھروں کی تعمیر جاری ہے۔ اس کے علاوہ 62 ہزار 500 سے زائد خاندانوں کو پہلی قسط اور 39 ہزار سے زائد خاندانوں کو دوسری قسط بھی جاری کی جا چکی ہے۔

علاوہ ازیں، ترجمان محکمہ ہاؤسنگ نے اجلاس میں بتایا کہ اپنی چھت اپنا گھر پروگرام کے تحت زیادہ سے زیادہ خاندانوں کو شامل کرنے کے لیے آگاہی مہمات کو مزید تیز کیا جائے گا۔ آگاہی مہمات چلانے کے لیے پبلک اور پرائیویٹ اداروں سے رابطے بڑھائے جائیں گے تاکہ زیادہ سے زیادہ لوگوں تک معلومات پہنچ سکیں۔ درخواست جمع کروانے کا طریقہ کار بھی انتہائی آسان اور مکمل طور پر آن لائن رکھا گیا ہے تاکہ مستحق افراد آسانی سے استفادہ کر سکیں۔

یہ بھی پڑھیں: ایبٹ آباد میں شہریوں نے نایاب چیتا مار دیا

اجلاس میں اخوت، بینک آف پنجاب، نیشنل ریڈیوسن کریڈٹ پروگرام (این آر سی پی) اور رورل کریڈٹ ڈیولپمنٹ پروگرام (آر سی ڈی پی) کے نمائندے بھی شریک ہوئے جنہوں نے تعاون جاری رکھنے اور پروگرام کو کامیابی سے مکمل کرنے کے عزم کا اظہار کیا۔

"واضح رہے کہ اپنی چھت اپنا گھر" پروگرام کے تحت پنجاب میں غریب اور مستحق خاندانوں کو اپنی چھت دینے کا ہدف کامیابی سے حاصل کیا جا رہا ہے، جس سے عوام کی رہائش کے مسائل کم کرنے میں مدد مل رہی ہے۔