سٹی ٹریفک پولیس لاہور کے 1220 افسران اور ٹریفک وارڈنز چہلم و عرس کی ڈیوٹی پر مامور ہیں۔ ایس ایس پی سٹی زون نوید ارشاد تمام تر ٹریفک انتطامات کی سپرویژن کریں گے۔ 4 ڈویژنل ایس پیز، 16 ڈی ایس پیز، 120 ٹریفک انسپکٹرز، 1078 ٹریفک وارڈنز اور ٹریفک اسسٹنٹس تعینات ہیں۔
رانگ پارکنگ کے خاتمے کیلئے ٹریفک رسپانس یونٹ کے 182 وارڈنز، 14 فورک لفٹرز اور 04 بریک ڈاؤنز بھی تعینات ہیں۔ عزاداروں و زائرین کی گاڑیوں کی پارکنگ کے لئے 06 پارکنگ اسٹینڈز بھی مختص کئے گئے ہیں۔
سی ٹی او لاھور ڈاکٹر اطہر وحید نے کہا کہ زائرین اپنی گاڑی، موٹر سائیکل کو گریٹر اقبال پارک، اسلامیہ ہائی سکول موہنی روڈ اور دربار آئی ہسپتال میں پارک کر سکتے ہیں، سنٹرل ماڈل ہائی سکول دہلی گیٹ اور اڈا کروان کے مقام پر زائرین کی گاڑیوں کو پارک کروایا جائیگا۔
ڈاکٹر اطہر وحید کا کہنا تھا کہ سکیورٹی کے پیش نظر مخصوص روڈز کو عام ٹریفک کیلئے بند رکھا گیا ہے، کچہری چوک، بھاٹی چوک اور ٹیکسالی چوک سے داتا دربار ہر قسم کی ٹریفک کیلئے بند رہے گا، شاہدرہ سے لوئر مال آنے والی ٹریفک کو آزادی چوک سے جانب ریلوے اسٹیشن بجھوایا جا رہا ہے، شاہدرہ سے لوئر مال آنے والی ٹریفک نیازی شہید چوک سے بند روڈ، سگیاں آوٹ فال روڈ بجھوائی جا رہی ہے۔

یہ بھی پڑھیں: شہدائے کربلا کا چہلم، کوئٹہ میں موبائل فون سروس معطل

انہوں نے کہا کہ چوبرجی چوک سے لوئر مال، داتا صاحب آنیوالی ٹریفک کو ایم اے او (MAO ) کالج سے متبادل راستوں پر ڈائیورٹ کیا جا رہا ہے، انر سرکلرروڈ سے آنیوالی ٹریفک موری گیٹ سے براستہ اردو بازار کچہری روڈ اپنی منزل کی طرف جاسکے گی، چوک ضلع کچہری، کارنر سی ٹی او آفس، گول چکر گورنمنٹ کالج یونیورسٹی سے کوئی بھی ٹریفک لوئر مال نہیں جاسکے گی، چوک ریٹیگین، چوک بلال گنج چوک بیری والا، گول چکر موری گیٹ سے بھی کوئی ٹریفک داتا دربار کی طرف نہیں جاسکے گی۔
سی ٹی او لاہور کے مطابق چوک ٹیکسالی، موری گیٹ، چوک آزادی سے بھی کسی قسم کی ٹریفک لوئرمال روڈ پر داخل نہیں ہوگی، شاہدرہ سے اپر مال آنے والے شہری براستہ ریلوے اسٹیشن، پریس کلب سے اپر مال جاسکیں گے، چوبرجی اور پی ایم جی چوک سے راوی روڈ جانے والے شہری براستہ سگیاں رنگ روڈ جا سکتے ہیں، چوبرجی سے ایم اے او کالج آنے والی ٹریفک سیکرٹیریٹ چوک کی بجائے ساندہ روڈ سے بند روڈ یا جین مندر سے مال روڈ کی طرف بھجوائی جا رہی ہے۔
ڈاکٹر اطہر وحید نے کہا کہ لوئر مال روڈ، چوک ضلع کچہری تا یو ٹرن پیر مکی ہر قسم کی ٹریفک کیلئے بند ہے، راستہ ایف ایم اور راستہ ایپ کے ذریعے شہریوں کو مکمل آگاہی دی جا رہی ہے، شہری مزید رہنمائی اور مدد کیلئے ہیلپ لائن 15 پر کال کر سکتے ہیں۔