آج ایوانِ صدر میں سول و عسکری قیادت کو اعزازات دینے کی تقریب ہوئی جس میں صدرِ مملکت آصف علی زرداری اور وزیرِ اعظم شہباز شریف نے سول و عسکری شخصیات کو اعلیٰ اعزازات عطا کیے۔

پاک فوج کے شعبہ تعلقات عامہ (آئی ایس پی آر) کے مطابق تقریب میں پاک فضائیہ کے افسر ونگ کمانڈر ملک رضوان الحق کو تمغۂ بسالت کے اعزاز سے نوازا گیا۔

تقریب کے دوران وزیرِ اعظم شہباز شریف نے پاک فضائیہ کے ونگ کمانڈر ملک رضوان الحق کو اعزاز عطاء کیا اور اس کے بعد انہیں اپنے ساتھ کھڑا کر کے حاضرین سے تعارف کرواتے ہوئے بتایا کہ انہوں نے بھارت کے دفاعی نظام ایس 400 سسٹم کو تباہ کیا، جس پر حال بھرپور تالیوں سے گونج اٹھا۔

خیال رہے کہ حالیہ پاک بھارت جنگ کے دوران 10 مئی کو بھارتی جارحیت کا منہ توڑ جواب دیتے ہوئے افواجِ پاکستان نے آپریشن بنیان مرصوص میں بھارتی ایئر بیسز اور دیگر فوجی اہداف کو کامیابی سے نشانہ بنایا تھا۔

آپریشن بنیان مرصوص کے دوران ہی پاک فضائیہ نے اپنے لڑاکا طیارے جے ایف 17 تھنڈر کے ہائپر سانک میزائل کے ذریعے بھارت کے جدید ترین ایس 400 ایئر ڈیفنس سسٹم کو بھی تباہ کیا تھا۔