پی ٹی آئی ترجمان شیخ وقاص اکرم نے پارٹی رہنماؤں کو سزا پر ردعمل دیتے ہوئے کہا کہ 9 مئی واقعات کے حوالے سے لاہور کی انسدادِ دہشت گردی عدالت کی جانب سے پارٹی قیادت اور کارکنوں کو سنائی گئی سزائیں انصاف اور عدل کے منہ پر ایک طمانچہ ہیں۔
ان کا کہنا تھا کہ پی ٹی آئی قیادت و رہنماؤں کے خلاف فیصلے سیاسی انتقام پر مبنی ہیں اور مذکورہ مقدمات میں شفافیت کو بالائے طاق رکھا گیا اور ملزمان کو اپنے دفاع کا موقع تک نہیں فراہم کیا گیا۔
پی ٹی آئی ترجمان نے کہا کہ قانونی تقاضے پورے کئے بغیر دیر رات تک بند کمروں میں ٹرائل چلائے گئے جن کا مقصد اس کارروائی کو عوام اور میڈیا کی نظروں سے چھپا کر مطلوبہ نتائج حاصل کرنا تھا، پری پلان منصوبے کے تحت بے بنیاد اور مضحکہ خیز شواہد اور گواہیوں کو بغیر کسی قانونی جواز کے قبول کر کے انصاف کے اصولوں کی توہین کی گئی۔
شیخ وقاص اکرم کا کہنا تھا کہ ملک کی مقبول ترین سیاسی جماعت کے رہنما ؤں کو دہشتگردی کے الزامات لگا کر سزا دینا آئین و انصاف کے منافی ہے، ایک طے شدہ سکرپٹ کے تحت یکے بعد دیگرے سنائے جانے والے فیصلوں سے یہ ظاہر ہوتا ہے کہ ان فیصلوں کا مقصد صرف اور صرف تحریک انصاف کو دیوار سے لگانا اور اس کی قیادت اور کارکنوں کو ہراساں کرنا ہے۔
یہ بھی پڑھیں: 9مئی کیس، یاسمین راشد، اعجاز چودھری و دیگر کو 10،10 سال قید کی سزا
ترجمان پی ٹی آئی کا کہنا تھا کہ ہم یہ واضح کرنا چاہتے ہیں کہ یہ عدالتی فیصلے ہمیں اپنے جمہوری حقوق اور آئین و قانون کی بالادستی کیلئے جدوجہد کرنے سے ہر گز نہیں روک سکتے۔
پی ٹی آئی رہنما نے کہا کہ پارٹی کی جانب سے ان تمام فیصلوں کے خلاف اعلیٰ عدلیہ میں اپیلیں دائر کی جائیں گی اور ہم آخری سانس تک انصاف کی لڑائی لڑیں گے، ہمارا مطالبہ ہے کہ قانون و انصاف کی روح کو بحال کیا جائے اور سیاسی بنیادوں پر قائم کیے گئے تمام مقدمات کو ختم کیا جائے۔
ترجمان پی ٹی آئی کا مزید کہنا تھا کہ ہم اپنے بے گناہ قائدین اور کارکنوں کے شانہ بشانہ کھڑے ہیں اور انہیں انصاف دلانے کے لیے ہر قانونی اور جمہوری راستہ اختیار کریں گے ۔
