محکمہ بلدیات کے مطابق شہریوں سے دو سو روپے سے لے کر پانچ ہزار روپے تک صفائی فیس وصول کی جائے گی جو رہائشی و کمرشل نوعیت کے علاقوں کے حساب سے مختلف ہوگی۔

محکمہ بلدیات پنجاب کا کہنا ہے کہ شہری اور دیہی علاقوں کے لیے فیس کا الگ الگ ڈھانچہ تیار کیا گیا ہے۔ جہاں رہائشی علاقوں میں نسبتاً کم اور کمرشل ایریاز میں زیادہ فیس عائد کی جائے گی۔ صفائی فیس کی وصولی کا عمل ڈیجیٹلائز کیا جائے گا۔ تاہم، ابتدائی دو ماہ بلز پرنٹ کر کے فراہم کیے جائیں گے۔

واضح رہے کہ شہری اپنی فیس آن لائن ایپلیکیشن کے ذریعے بھی ادا کر سکیں گے جبکہ ان علاقوں میں جہاں شہری آن لائن ادائیگی نہیں کر سکیں گے وہاں صفائی کمپنیوں کے سپروائزرز فیس وصول کریں گے۔

یہ بھی پڑھیں: وزیراعلیٰ پنجاب مریم نواز کا وژن، راوی سٹی پراجیکٹ میں پیش رفت

محکمہ بلدیات کے مطابق "ستھرا پنجاب مہم" گزشتہ آٹھ ماہ سے جاری ہے جس کے دوران عوام سے کوئی فیس نہیں لی گئی۔ اب اس مہم کو پائیدار بنانے کے لیے فیس کا نفاذ کیا جا رہا ہے۔ پہلے سال کے دوران فیس وصولی کا ہدف 15 بلین روپے رکھا گیا ہے۔

یاد رہے کہ فیس وصولی کا نوٹیفکیشن جلد جاری کر دیا جائے گا جس کے بعد باقاعدہ وصولی کا عمل شروع کر دیا جائے گا۔ یہ اقدام شہری سہولیات کی بہتری اور صفائی کے نظام کو مؤثر بنانے کے لیے اہم پیش رفت سمجھا جا رہا ہے۔