لاہور ہائیکورٹ کے باہر میڈیا سے گفتگو کرتے ہوئے سابق وفاقی وزیر فواد چودھری کا کہنا تھا کہ بانی پی ٹی آئی عمران خان کو جیل میں رکھنے میں موجودہ پی ٹی آئی قیادت کا کردار ہے ، اگر بانی پی ٹی آئی جیل سے باہر آگئے تو تحریک انصاف کی موجودہ قیادت کی لیڈری ختم ہو جائے گی۔
انہوں نے کہا کہ پاکستان تحریک انصاف کی قیادت سینیٹ کی سیٹوں کی بندر بانٹ میں مصروف ہے، تحریک انصاف کا اس وقت مسئلہ سیٹیں کم یا زیادہ ہونا نہیں ہونا چاہیے، اصل مسئلہ پیٹرن انچیف پی ٹی آئی کی رہائی ہے۔
عمران خان کی سابقہ اہلیہ ریحام خان کی جانب سے نئی سیاسی جماعت اعلان سے متعلق پوچھے گئے ایک سوال کے جواب میں فوا د چودھری کا کہنا تھا کہ ملک میں مزید سیاسی پارٹیوں کی گنجائش نہیں ہے، جو بھی سیاسی جماعت بنے گی اس کی حیثیت ریحام خان کی پارٹی جیسی ہوگی۔
یہ بھی پڑھیں: خیبرپختونخوا میں پی ٹی آئی، ن لیگ اور پی پی ایک پیچ پر
فوا دچودھری نے کہا کہ مستقبل کی سیاست بانی پی ٹی آئی عمران خان کے ساتھ جڑی ہے، پی ٹی آئی کی موجودہ لیڈر شپ میں تحریک چلانے کی صلاحیت نہیں، عمران خان کے بیٹے آجائیں تو پوزیشن مختلف ہو سکتی ہے۔
سابق وفاقی وزیر نے پی ٹی آئی قیادت پر تنقید کرتے ہوئے مزید کہا کہ پی ٹی آئی پنجاب کی چیف آرگنائزر عالیہ حمزہ کا تحریک میں کوئی کردار نہیں ہے،تحریک انصاف میں سیاسی حکمت عملی کا فقدان ہے جس کی وجہ سے لوگ باہر نہیں نکلتے۔
