تفصیلات کے مطابق جمشید دستی کے خلاف قومی اسمبلی کے اسپیکر کی جانب سے بھیجا گیا ریفرنس الیکشن کمیشن نے منظور کر لیا۔ اس ریفرنس میں ان کی تعلیمی اسناد کے حوالے سے سنگین الزامات عائد کیے گئے۔ الیکشن کمیشن نے ان الزامات کا مکمل جائزہ لینے کے بعد یہ نتیجہ اخذ کیا کہ جمشید دستی کی پیش کردہ تعلیمی اسناد جعلی ہیں، اور اس بنیاد پر انہیں عوامی نمائندگی کے لیے نااہل قرار دیا گیا۔

یہ بھی پڑھیں: مخصوص نشستیں: الیکشن کمیشن کا گورنر خیبرپختونخوا کو خط

جمشید دستی کے خلاف دو الگ الگ درخواستیں الیکشن کمیشن میں دائر کی گئی تھیں، جن میں ان کی تعلیمی اہلیت اور دستاویزات پر اعتراضات اٹھائے گئے تھے۔ ان دونوں درخواستوں کو الیکشن کمیشن نے منظور کرتے ہوئے ان کی نااہلی کا فیصلہ سنایا۔

جمشید دستی ماضی میں بھی کئی بار متنازعہ بیانات، اقدامات اور قانونی مسائل کی زد میں آ چکے ہیں، تاہم اس بار معاملہ ان کی تعلیمی اسناد کے جعلی ہونے سے متعلق تھا جو کہ پاکستان کے انتخابی قوانین کے تحت ایک سنگین جرم ہے۔ آئین پاکستان کے آرٹیکل 62 اور 63 کے مطابق، کسی بھی عوامی نمائندے کے لیے صادق اور امین ہونا لازم ہے، اور اگر وہ جعل سازی یا دھوکہ دہی میں ملوث پایا جائے تو وہ رکنیت کے لیے نااہل قرار دیا جا سکتا ہے۔