تفصیلا ت کے مطابق اب شہری پاک آئی ڈی موبائل ایپ کے ذریعے اپنے خاندان میں درج افراد کی فہرست گھر بیٹھے چیک کر سکتے ہیں اور انہیں نادرا دفتر جانے کی ضرورت نہیں۔ اگر فیملی رجسٹریشن میں کوئی اجنبی یا غیر متعلقہ شخص ظاہر ہو رہا ہو تو نادرا نے فوری طور پر رپورٹ کرنے کی ہدایت کی ہے۔

نادرا حکام نے خبردار کیا ہے کہ خاندانی ریکارڈ میں غیر متعلقہ افراد کی موجودگی مستقبل میں سنگین قانونی مسائل کا باعث بن سکتی ہے۔ نئے قواعد کے تحت ایف آئی آر اور دیگر سرکاری دستاویزات صرف نادرا میں موجود تصدیق شدہ معلومات کی بنیاد پر ہی جاری کی جائیں گی۔

نادرا کے ترجمان کا کہنا ہے کہ آپ کی شناخت آپ کی قانونی بنیاد ہے۔ ہم تمام شہریوں کو ہدایت دیتے ہیں کہ وہ چند منٹ نکال کر پاک-آئی ڈی ایپ میں لاگ ان ہوں اور اپنا فیملی ریکارڈ چیک کریں۔ اگر کوئی غلطی نظر آئے تو اسے فوراً درست کروائیں اور ہرگز نظر انداز نہ کریں۔

یہ بھی پڑھیں: عوام کیلئے خوشخبری، پہلی بار شناختی کارڈ بنوانے کا طریقہ جانیے

یاد رہے کہ فیملی رجسٹریشن سرٹیفکیٹ (FRC) ایک اہم قانونی، امیگریشن اور ذاتی نوعیت کے امور میں درکار دستاویز ہے ۔ اس کی درستگی نہایت ضروری ہے۔

پاک-آئی ڈی ایپ کے ذریعے آپ اپنے نادرا رجسٹرڈ خاندانی افراد کی فہرست دیکھ سکتے ہیں، مشکوک یا اجنبی ناموں کی نشاندہی، درستگی یا تبدیلی کی درخواست ، تازہ ترین فیملی رجسٹریشن سرٹیفکیٹ (FRC) حاصل کر نے جیسی سہولیات حاصل کر سکتے ہیں۔

اگر آپ کو شبہ ہو کہ کوئی غیر متعلقہ شخص آپ کے فیملی ریکارڈ میں شامل ہے تو نادرا کی جانب سے فوری اقدام کی تلقین کی گئی ہے  چاہے موبائل ایپ کے ذریعے یا قریبی نادرا دفتر جا کر  تاکہ آپ اپنی شناخت کو محفوظ بنا سکیں اور مستقبل میں کسی قانونی پیچیدگی سے بچا جا سکے۔