ترجمان این ڈی ایم اے کے مطابق آج 29 جون سے 5 جولائی تک کشمیر، اسلام آباد، پوٹھوہار، شمالی و وسطی خیبر پختونخوا میں موسلادھار بارشوں کا امکان ہے، ممکنہ بارشوں کے نتیجے میں پشاور، چارسدہ، نوشہرہ اور کوہاٹ میں شہری سیلاب کا خدشہ ہے۔
این ڈی ایم اے کی جانب سے کہا گیا ہے کہ جڑواں شہروں راولپنڈی، اسلام آباد، اٹک اور چکوال میں آج رات 9 بجے سے صبح 4 بجے تک شدید بارش کا امکان ہے جبکہ جہلم، منڈی بہاؤالدین، گجرات، سیالکوٹ، گوجرانوالہ، نارووال اور لاہور میں بھی موسلادھار بارش متوقع ہے۔
ترجمان کا کہنا تھا کہ بارشوں کے باعث فیصل آباد اور سرگودھا ڈویژن کے نشیبی علاقوں سیلابی صورتحال کا اندیشہ ہے،ہزارہ، مالاکنڈ، آزاد کشمیر اور پیر پنجال کے ندی نالوں میں طغیانی اور پہاڑی علاقوں میں لینڈ سلائیڈنگ کا امکان ہے۔
یہ بھی پڑھیں: ملک بھر میں ممکنہ سیلاب کا خطرہ، ہنگامی الرٹ جاری
این ڈی ایم اے کے مطابق دریائے کابل، دریائے سوات اور چترال و ہنزہ سے منسلک ندی نالوں میں پانی کے بہاؤمیں اضافہ متوقع ہے جبکہ 2 سے 5 جولائی کے دوران کراچی، حیدرآباد، ٹھٹھہ اور بدین میں شدید بارشوں کے باعث اربن فلڈنگ کا خدشہ بڑھ گیا ہے۔
ترجمان نے شہریوں کو ہدایت کی کہ بارش اور تیز ہواؤں کے دوران کمزور تعمیرات، کچی دیواروں، بجلی کے کھمبوں اوربل بورڈز سے دور رہیں،آندھی اور طوفان کے دوران حد نگاہ بھی کم ہو سکتی ہے جو حادثات کا باعث بنتی ہے لہذا محتاط رہیں۔
نیشنل ایمرجنسیز آپریشن سینٹر کے مطابق
— NDMA PAKISTAN (@ndmapk) June 29, 2025
29 جون سے 5 جولائی تک ملک بھر میں شدید مون سون بارشوں اور ممکنہ سیلاب کا خطرہ۔
کشمیر گلگت بلتستان، اسلام آباد، پوٹھوہار: ایبٹ آباد، مانسہرہ، ہری پور، بالاکوٹ، مری، گلیات میں موسلادھار بارش، لینڈ سلائیڈنگ اور ندی نالوں میں طغیانی کا خدشہ pic.twitter.com/d8ApdzqOSs
ان کا مزید کہنا تھا کہ این ڈی ایم اے نے تمام متعلقہ اداروں کو ہدایات جاری کی ہیں کہ کسی بھی ممکنہ ہنگامی صورتحال سے نمٹنے کے لیے پیشگی اقدامات کو یقینی بنایا جائے، عوام سے گزارش ہے کہ موسم اور ممکنہ خطرات کے حوالے سے آگاہی کے لیے پاک این ڈی ایم اے ڈیزاسٹر الرٹ ایپ سے رہنمائی لیں۔
