محکمہ انتظامیہ کے مطابق تعطیل کا حتمی فیصلہ مرکزی رویت ہلال کمیٹی کے چاند دیکھنے کے اعلان سے مشروط ہوگا۔ چاند نظر آنے کی صورت میں جو بھی دن یکم محرم الحرام قرار پائے گا، اسی دن صوبے بھر میں دفاتر، تعلیمی ادارے، اور دیگر سرکاری و نیم سرکاری ادارے بند رہیں گے۔

یہ بھی پڑھیں: محرم الحرام میں کتنی چھٹیاں ہوں گی ؟ نوٹیفکیشن جاری

یہ فیصلہ محرم الحرام کے مقدس مہینے کی حرمت اور امن و امان کی صورتحال کو مدنظر رکھتے ہوئے کیا گیا ہے۔ محرم الحرام اسلامی تقویم کا پہلا مہینہ ہے اور اس مہینے کو تمام مسلم دنیا میں خاص اہمیت حاصل ہے، بالخصوص دس محرم کو یوم عاشور کے طور پر یاد کیا جاتا ہے۔

خیبرپختونخوا حکومت کا یہ اقدام عوامی جذبات اور مذہبی روایتوں کے احترام کا مظہر ہے۔ اس اعلان کے بعد مختلف اضلاع کی انتظامیہ کو ہدایات جاری کی گئی ہیں کہ وہ محرم الحرام کے دوران سیکیورٹی کے سخت انتظامات کو یقینی بنائیں تاکہ کسی بھی ناخوشگوار واقعے سے بچا جا سکے۔

محرم کے دوران صوبے میں مجالس اور جلوسوں کا انعقاد کیا جاتا ہے، جس کے لیے پولیس اور دیگر قانون نافذ کرنے والے ادارے اپنی تیاریوں میں مصروف ہیں۔ حکومت نے عوام سے بھی اپیل کی ہے کہ وہ امن و امان برقرار رکھنے میں انتظامیہ کے ساتھ مکمل تعاون کریں اور فرقہ وارانہ ہم آہنگی کو فروغ دیں۔