محکمہ موسمیات کی جانب سے جاری کردہ رپورٹس کے مطابق اسلام آباد اور گردونواح میں دن کے اوقات میں موسم شدید گرم اور خشک رہے گا، تاہم شام اور رات کے وقت مطلع جزوی طور پر ابر آلود رہنے اور چند مقامات پر بارش کا امکان ہے۔
خیبرپختونخوا کے بیشتر اضلاع میں موسم گرم اور خشک رہنے کا امکان ہے۔ جنوبی اور وسطی اضلاع میں دن کے وقت شدید گرمی پڑنے کی توقع ہے، تاہم شام اور رات میں چترال، دیر، سوات، کوہستان، بٹ گرام، مانسہرہ، ایبٹ آباد، کرم، خیبر اور وزیرستان میں تیز ہواؤں کے ساتھ بارش ہو سکتی ہے۔
اسیطرح پنجاب کے بیشتر اضلاع میں بھی دن کے وقت شدید گرمی کی پیشگوئی کی گئی ہے،جبکہ شام اور رات کے وقت مری، گلیات، راولپنڈی، اٹک، چکوال، جہلم، خوشاب، منڈی بہاؤالدین اور گجرات میں تیز ہواؤں اور بارش کا امکان ظاہر کیا گیا ہے۔ علاوہ ازیں پنجاب کے وسطی اور جنوبی اضلاع میں بعد از دوپہر تیز اور گرد آلود ہوائیں چلنے کا امکان ہے۔
دوسری جانب سندھ کے بیشتر اضلاع میں موسم شدید گرم اور خشک رہنے کی پیشگوئی کی گئی ہے،جبکہ بعد از دوپہر صوبے کے مختلف علاقوں میں گرد آلود ہوائیں چل سکتی ہیں۔
بلوچستان کے بیشتر اضلاع میں بھی موسم گرم اور خشک رہنے کا امکان ہے، جبکہ جنوبی اضلاع میں موسم شدید گرم رہنے اور تیز ہوائیں چلنے کی پیشگوئی کی گئی ہے۔
محکمہ موسمیات کی جانب سے شہریوں کو مشورہ دیا گیا ہے کہ وہ غیر ضروری طور پر دھوپ میں نکلنے سے گریز کریں اور موسمی صورتحال سے باخبر رہیں۔
